ბიტკოინის დღეები დათვლილია

ბიტკოინის დღეები დათვლილია

კორნელის უნივერსიტეტის საერთაშორისო სავაჭრო პოლიტიკის პროფესორის, ესვარ პრასადის აზრით, ბიტკოინი არსებობას მალე შეწყვეტს და ადგილს უფრო მდგრად კრიპტოვალუტებს დაუთმობს.

ამის შესახებ წიგნის „ფულის მომავალი: როგორ ცვლის ციფრული რევოლუცია ვალუტებს და ფინანსებს“ავტორმა ესვარ პრასადმა CNBC-ის გადაცემაში „Squawk Box Europe“ განაცხადა.

მან განმარტა, რომ ბოლო რამდენიმე წლის განმავლობაში, ბიტკოინის კურსი ძალიან არასტაბილური იყო. ნოემბერში მან რეკორდულ მაჩვენებელს – 69,000 დოლარს მიაღწია, ახლა კი BTC-ის კურსი 46,000 დოლარია.

გარდა ამისა, პრასადმა ბიტკოინი მისი მაინინგის მაღალი ენერგიის ხარჯებისთვის გააკრიტიკა. იმის გათვალისწინებით, რომ ადრე მხოლოდ რამდენიმე კრიპტოვალუტა არსებობდა და დღეს უკვე რამდენიმე ათასია, ბევრი მათგანი, პრასადის თქმით, უფრო სასარგებლო და ეკოლოგიურად სუფთაა, ვიდრე ბიტკოინი.

„ბიტკოინი ბლოკჩეინის ტექნოლოგიას ეფექტურად არ იყენებს. ის ტრანზაქციის ვალიდაციის ეკოლოგიურად დესტრუქციულ  მექანიზმს იყენებს. გარდა ამისა, ის ცუდად მასშტაბირებს.“- თქვა პრასადმა.

ამასთან, პროფესორი მიიჩნევს, რომ ბლოკჩეინს გადახდების სფეროს ძირეული შეცვლა ისეთი ოპერაციების გამარტივებით შეუძლია, როგორიცაა უძრავი ქონების ან მანქანის ყიდვა.

თუმცა, პრასადის აზრით ბიტკოინი, როგორც გაცვლის საშუალება ცუდად მუშაობს, ამიტომ ნაკლებად სავარაუდოა, რომ გარდა ინვესტორების ნდობისა მას  ფუნდამენტური ღირებულება ჰქონდეს.

პრასადმა აღნიშნა, რომ კრიპტო აქტივებმა  ცენტრალურ ბანკებს საკუთარი ციფრული ვალუტების შექმნა და განავითარება „აიძულეს“.

პროფესორის თქმით, სამთავრობო სტეიბლკოინები სასარგებლო იქნება, რადგან მათ ტრანზაქციის ხარჯების შემცირება და საბანკო სერვისებზე საზოგადოების წვდომის გაზრდა შეუძლიათ,

რითაც  ფინანსური სისტემის სტაბილურობას უზრუნველყოფენ.

„რამდენიც არ უნდა ვლანძღოთ ბიტკოინი, მან მართლაც რევოლუცია მოახდინა, რაც საბოლოო ჯამში საზოგადოებისთვის პირდაპირ ან ირიბად სარგებლის მომტანი იქნება.“- დაასკვნა პრასადმა.

პრასადმა გასულ წელს განაცხადა, რომ ციფრული იუანი საერთაშორისო გადახდებში იუანის როლს გაზრდის, მაგრამ სარეზერვო ვალუტის რანგში დოლარს ვერ ჩაანაცვლებს.

წყარო: https://bits.media