ბრიტანეთმა კრიპტოვალუტის რეგულირების ზოგადი წესები გამოაქვეყნა

ბრიტანეთმა კრიპტოვალუტის რეგულირების ზოგადი წესები გამოაქვეყნა

დიდი ბრიტანეთის ფინანსთა მინისტრმა, რეიჩელ რივზმა (Rachel Reeves) კრიპტოვალუტის რეგულირების კომპლექსური წესები წარადგინა, რომელთა მიხედვითაც კრიპტო ბირჟებს, დილერებსა და აგენტებს ტრადიციული ფინანსური ფირმების მსგავსი რეგულაციები დაუწესდებათ.

კრიპტოვალუტის კომპანიები ვალდებულნი იქნებიან ინფორმაციის შეგროვების გამჭვირვალობა, მომხმარებელთა უსაფრთხოება და ოპერაციული მდგრადობა უზრუნველყონ.

2000 წელს შემოღებული ფინანსური მომსახურებისა და ბაზრების შესახებ კანონს საქმიანობის ახალი სფეროების – კრიპტოვალუტით ვაჭრობის, ციფრული აქტივების შენახვისა და სტეიკინგების რეგულირება შეემატება.

გამოქვეყნებული წესების თანახმად, სტეიბლკოინები არა როგორც ელექტრონული ფული, არამედ ფასიანი ქაღალდების სტატუსით კლასიფიცირდება. ეს იმას ნიშნავს, რომ დიდ ბრიტანეთში გამოშვებული და ადგილობრივი ფიატური ვალუტით უზრუნველყოფილი სტეიბლკოინები გამოსყიდვის პროტოკოლებსა და ტექნიკურ დოკუმენტაციაში მითითებულ ინფორმაციას უნდა შეესაბამებოდნენ.

სხვა ქვეყნებში გამოშვებული სტეიბლკოინებით ვაჭრობა დიდ ბრიტანეთში მხოლოდ რეგულირებადი პლატფორმების მეშვეობით იქნება შესაძლებელი.

კრიპტო ბირჟა Bitget-ის ოპერაციების დირექტორი ვუგარ უსი ზადე (Vugar Usi Zade) დარწმუნებულია, რომ ახალმა წესებმა ინდუსტრიაზე დადებითად უნდა იმოქმედოს. მისი განმარტებით, ბევრი კრიპტო კომპანია დიდი ბრიტანეთის ბაზარზე შესვლას იმის გამო ერიდება, რომ გაურკვეველია თუ რა ტიპის აქტივობები, პროდუქტები თუ ოპერაციები საჭიროებენ ადგილობრივი მარეგულირებლების ნებართვას.

ზადეს თქმით, ახლა იმისათვის, რომ ბრიტანელ ტრეიდერებს კრიპტოვალუტით ვაჭრობის, მისი შენახვის, სტეიკინგის ან სესხების შესაძლებლობა შესთავაზონ, ინდუსტრიის კომპანიებმა დიდი ბრიტანეთის ფინანსური ქცევის ორგანოსგან (FCA) თანხმობა უნდა მიიღონ.

თუმცა, Bitget-ის ტოპ მენეჯერი შიშობს, რომ 2011 წლის ელექტრონული ფულის რეგულაციებიდან (EMR) სტეიბლკოინების ამოღებამ შესაძლოა ტოკენების გადახდის საშუალებად დანერგვა შეანელოს.