ციფრული ევრო ევროკავშირს სხვა საგადახდო სისტემებისგან დამოუკიდებელს გახდის

ციფრული ევრო ევროკავშირს სხვა საგადახდო სისტემებისგან დამოუკიდებელს გახდის

ჰოლანდიის ცენტრალური ბანკის (DNB) პრეზიდენტის განცხადებით, ციფრული ქაღალდის ფულს ვერ ჩაანაცვლებს, მაგრამ ევროკავშირის გადახდის არაევროპულ ტექნოლოგიებზე დამოკიდებულებას შეამცირებს.

კლაას ნოტმა (Klaas Knot) იტალიაში საკონსულტაციო კომპანია The European House – Ambrosetti-ს მიერ გამართულ ყოველწლიურ საერთაშორისო ეკონომიკურ კონფერენციაზე განცხადება გააკეთა. ღონისძიებაზე ყოველწლიურად სახელმწიფოს მეთაურები, მინისტრები, ნობელის პრემიის ლაურეატები და ბიზნესმენები იკრიბებიან, რათა მსოფლიო ბაზრის პრობლემები განიხილონ.

„სადაც არ უნდა გაიხედო, ჩვენს გარშემო ყველაფრის გაციფრულება ხდება. ხომ არ დადგა დრო რომ ჩვენს საფულეებში მონეტებმა და კუპიურებმაც იგივე განიცადონ? ხომ არ დადგა დრო, რომ ჩვენი ცენტრალური ბანკების ვალუტები ციფრული გახდეს? და პასუხია: რა თქმა უნდა ციფრული ევრო! “ – განაცხადა De Nederlandsche Bank-ის (DNB) პრეზიდენტმა.

ნოტი შეეცადა ციფრული ევროსა და ზოგადად ცენტრალური ბანკების ციფრული ვალუტების (CBDCs) იდეის შესახებ არსებული შეშფოთება გაეფანტა.

მისი განცხადებით, ციფრული ევრო კომერციულ და ცენტრალურ ბანკებს შორის, ანუ კერძო და სახელმწიფო ფინანსებს შორის ათწლეულების მანძილზე არსებულ ბალანსს არ დაარღვევს. მისი რწმენით, CBDC კერძო ინოვაციებს არ ჩაანაცვლებს.

ნოტის აზრით, სახელმწიფო სტეიბლკოინები ციფრული ფულის მიმართ საზოგადოების ნდობას გაზრდის.

მას მიაჩნია, რომ ციფრულ ანალოგს ქაღალდის ფულის იდენტური შესაძლებლობები უნდა ჰქონდეს. საუბარია კონფიდენციალურობაზე, როდესაც არავინ იცის, რა შესყიდვებს ახორციელებენ ადამიანები CBDC-ის გამოყენებით.

ციფრული ევროს გამოყენების შესაძლებლობა ყველა ადამიანს უნდა ჰქონდეს, მათაც კი, ვინც ციფრულ ტექნოლოგიებში ცუდად ერკვევა, ამბობს ნოტი. მისი დასკვნით :

„ციფრული ევრო საჭიროა იმისთვის, რომ საზოგადოებას ფეხი ავუწყოთ, ვისწრაფოთ დამოუკიდებლობისკენ და სახელმწიფო ფინანსებზე წვდომა ციფრულ სივრცეში შევინარჩუნოთ.“

გასულ წელს, პრანკერებმა ევროპის ცენტრალური ბანკის (ECB) პრეზიდენტთან კრისტინ ლაგარდთან უკრაინის პრეზიდენტ ვლადიმერ ზელენსკის სახელით ინტერვიუ ჩაწერეს. როგორც ლაგარდმა ინტერვიუში განაცხადა, ციფრულ ევროს მომხმარებლების თვალთვალისთვის გამოიყენებენ.