უცხოური მაინინგ კომპანიები აშშ-ს საფრთხეს უქმნიან

უცხოური მაინინგ კომპანიები აშშ-ს საფრთხეს უქმნიან

აშშ-ს სენატის საბანკო, საბინაო და ურბანული საკითხებისადმი მიძღვნილ საკომიტეტო მოსმენაზე დემოკრატმა სენატორმა კოლეგების ყურადღება იმ პოტენციურ საფრთხეებზე გაამახვილა, რომლებიც ამერიკაში ციფრული აქტივების სფეროში მომუშავე უცხოური კომპანიებისგან მომდინარეობს.

ელიზაბეტ უორენის (Elizabeth Warren) თქმით, შეერთებულ შტატებში მაინინგ კომპანიების მესამედზე მეტი ჩინეთის მოქალაქეების საკუთრებას წარმოადგენს, რომლებსაც ჩინეთის მთავრობასთან პირდაპირი კავშირი აქვთ. უორენი დარწმუნებულია, რომ:

 „გარემოსთვის მიყენებული ზიანის გარდა, კრიპტო მაინინგის კომპანიები საფრთხეს უქმნიან ეროვნულ უსაფრთხოებას და შესაძლოა აშშ-ს ენერგეტიკის სექტორის, ენერგიის ხელმისაწვდომობისა და მიწოდების ქსელების შესახებ მონაცემების შეგროვებისთვის იქნას გამოყენებული“

სენატორმა მაგალითისტვის The New York Times-ის მონაცემები მოიყვანა, რომელთა მიხედვითაც, ჩინეთის მოქალაქეების საკუთრებაში არსებული ამერიკული მაინინგ კომპანიები მოიხმარენ იმდენ ელექტროენერგიას, რამდენიც 1,5 მილიონზე მეტ საოჯახო მეურნეობას დააკმაყოფილებდა.

იმის შესახებ, რომ უცხოურ საკუთრებაში არსებული კრიპტო მაინინგ კომპანიების შეერთებული შტატების ელექტრო სისტემასთან დაკავშირება საფრთხის შემცველია, ეროვნული უსაფრთხოების ექსპერტები მთავრობას დიდი ხანია აფრთხილებენ.

ელიზაბეტ უორენს მიაჩნია, რომ უცხოელ მოქალაქეებს შეერთებულ შტატებში მაინინგ ბიზნესის ყიდვა ფარულად, კრიპტოვალუტით ანგარიშსწორების მეშვეობით შეუძლიათ.

„კრიპტოვალუტა ტრადიციული საბანკო სისტემისა და ფულის გათეთრების საწინააღმდეგო იმ რეგულაციების გვერდის ავლის შესაძლებლობას იძლევა, რომლებმაც შეერთებულ შტატებში ნებისმიერი ანონიმური უცხოური ფულის შემოდინება უნდა აღკვეთონ. ფაქტობრივად, ასე შეძლო ჩინელმა ინვესტორმა 6 მილიონ დოლარად კონტინენტთაშორისი ბალისტიკური რაკეტების განთავსების სტრატეგიული ბაზიდან სულ რაღაც ერთ მილში, მაინინგ ფერმის ფარულად ყიდვა.“- განაცხადა უორენმა.

მაისში აშშ-ს პრეზიდენტმა ჯო ბაიდენმა გამოსცა ბრძანება, რომლითაც ჩინურ მაინინგ კომპანია MineOne Partners-ს ვაიომინგში საჰაერო ძალების ბაზასთან არსებული ქონების მართვა აეკრძალა.