FTX Digital Markets-ის ყოფილ თანადირექტორს ჩინელი მაღალჩინოსნების მოსყიდვაში ადანაშაულებენ

FTX Digital Markets-ის ყოფილ თანადირექტორს ჩინელი მაღალჩინოსნების მოსყიდვაში ადანაშაულებენ

აშშ-ს პროკურატურამ კრიპტობირჟებზე გაყინული სახსრების გამოყენების მცდელობაში FTX Digital Markets-ის ყოფილი თანადირექტორის მონაწილეობა გამოავლინა.

პროკურორების განცხადებით, მათ FTX-ის ხელმძღვანელის სემ ბენკმენ-ფრიდის (Sam Bankman-Fried) მიერ მართული ქრთამის აღების სქემაში რაიან სალამეს (Ryan Salame) მონაწილეობის უტყუარი მტკიცებულებები აქვთ.

პროკურორების მტკიცებით, სალამეს იმ მაღალჩინოსნებისთვის თანხების ჩასარიცხად, რომლებიც ჩინური კრიპტო ბირჟებიდან Alameda Research-ის გაყინული აქტივების დაბრუნებაში დახმარებას დათანხმდნენ, ყალბი ანგარიშების გახსნა დაევალა.

ოლქის პროკურორის თანაშემწე დანიელ სასუნის თქმით, მტკიცებულებები Alameda-ს ყოფილი აღმასრულებელი დირექტორის, ქეროლაინ ელისონის (Caroline Ellison) ჩვენებით არის გამყარებული, რომელმაც სასამართლოს ჩინეთის მთავრობისთვის 150 მილიონ დოლარზე მეტი ქრთამის მიცემის შესახებ დაუდასტურა, კრიპტობირჟებიდან OKX და Huobi 1 მილიარდი დოლარის გამოტანის სანაცვლოდ.

„გვაქვს მტკიცებულება, რომ სალამემ იცოდა ქრთამის შესახებ და აქტიურად მონაწილეობდა Alameda-ს გაყინული ანგარიშების გამოყენების მცდელობებში, მათ შორის მესამე მხარის პირადი საიდენტიფიკაციო ინფორმაციის უკანონოდ გამოყენების მეშვეობით, რომელთაც ის ტაილანდელი მეძავების სახელით მოიხსენიებდა.“ – განაცხადა პროკურორის თანაშემწემ.

რაიან სალამეს საქმეში ახალი ფაქტების გამოჩენასთან დაკავშირებული სკანდალი საპროცესო შეთანხმებაზე მისი უარის ფონზე ვითარდება.

სალამეს ადვოკატების თქმით, ჩვენების მიცემაზე უარის თქმისა და შეთანხმების გაუქმების მიზეზი მიშელ ბონდის (Michelle Bond)  წინააღმდეგ სისხლის სამართლის საქმის აღძვრა გახდა, რომელთანაც FTX Digital Markets-ის ყოფილი თანადირექტორი სამოქალაქო ქორწინებაში იმყოფებოდა.

მანამდე სალამე საპროცესო შეთანხმებას იმის სანაცვლოდ დათანხმდა, რომ პროკურორები ბონდის დევნას შეწყვეტდნენ.

აშშ-ის ფასიანი ქაღალდებისა და ბირჟების კომისიის (SEC) ყოფილ ადვოკატს და ციფრული აქტივების ბაზრების ასოციაციის (ADAM) ყოფილ აღმასრულებელ დირექტორს, მიშელ ბონდს ბრალად საკუთარი წინასაარჩევნო კამპანიისთვის FTX Group-ისგან ასობით ათასი დოლარის შემოწირულობების დამალვა ედება.