ნიუ-იორკის სასამართლომ FTX-ის თანადამფუძნებლის საქმეზე განაჩენი გამოიტანა

ნიუ-იორკის სასამართლომ FTX-ის თანადამფუძნებლის საქმეზე განაჩენი გამოიტანა

ნიუ-იორკის სასამართლომ გაკოტრებული კრიპტო ბირჟა FTX-ის თანადამფუძნებელსა და ყოფილ ტექნიკურ დირექტორს, გერი ვონგს (Gary Wang) სავაჭრო პლატფორმის ჩამოშლაში წვლილის შეტანისთვის 11 მილიარდი დოლარის ოდენობის ჯარიმის გადახდა დააკისრა.

საოლქო მოსამართლემ ლუის კაპლანმა (Lewis Kaplan) ბრალდებულის წინასწარ პატიმრობაში ყოფნის პერიოდი გაითვალისწინა და ვონგს სამი წლით პირობითი მსჯავრი შეუფარდა . ვონგმა თაღლითობაში მონაწილეობა ჯერ კიდევ 2022 წლის დეკემბერში აღიარა და სამართალდამცავ ორგანოებთან თანამშრომლობის მზადყოფნა გამოთქვა. FTX-ის ყოფილი ტექნიკური დირექტორი ბირჟის ყოფილი აღმასრულებელი დირექტორის სემ ბენკმენ-ფრიდის (Sam Bankman-Fried) სასამართლო პროცესზე მთავარ მოწმედ წარსდგა.

ვონგს ციფრული აქტივებისა და ფასიანი ქაღალდებით თაღლითობისთვის 50 წლამდე თავისუფლების აღკვეთა ემუქრებოდა. ნოემბრის დასაწყისში ვონგის დაცვამ სასამართლოს თხოვნით მიმართა, რათა საქმის გამოძიებაში მისი თანამშრომლობა გაეთვალისწინებინათ და მისთვის პატიმრობა არ შეეფარდათ. ადვოკატების თქმით, მათი კლიენტი თაღლითობაში უშუალოდ არ მონაწილეობდა და რომ მან Alameda Research-ის შვილობილი კომპანიის კლიენტებისგან თანხების ბოროტად გამოყენების შესახებ ძალიან გვიან შეიტყო.
სასამართლო სხდომაზე ვანგმა ბოდიში მოუხადა FTX-ის მომხმარებლებსა და ინვესტორებს, რომლებმაც ბირჟის გაკოტრების შედეგად ფინანსური დანაკარგი განიცადეს.

„იმის მაგივრად რომ სწორად მოვქცეულვიყავი, მე მარტივი და უღირსი გზა ავირჩიე. ჩემს დარჩენილ ცხოვრებას გამოსწორების მცდელობაში დავხარჯავ.“- თქვა ვონგმა სასამართლო სხდომაზე.

ბენკმენ-ფრიდის წინააღმდეგ ჩვენება ვონგს სასამართლოს კეთილგანწყობის მოპოვებაში დაეხმარა. მოსამართლე კაპლანმა საქმის გამოძიებაში FTX-ის თანადამფუძნებლის მნიშვნელოვანი წვლილი აღნიშნა.

ოლქის პროკურორის თანაშემწემ ნიკოლას რუსმა კი ვონგს მადლობა იმ რთული სისტემის გაშიფრვისთვის გადაუხადა, რომელსაც FTX მომხმარებელთა სახსრების მითვისებისთვის იყენებდა. გარდა ამისა, როგორც პროკურარმა აღნიშნა, ვონგის პროგრამირების ტექნიკური უნარები კრიპტო ბირჟებსა და საბაზრო ფონდებზე თაღლითობის აღმოსაჩენედ სასარგებლო აღმოჩნდა.