ტრამპმა კრიპტო და AI სექტორის ხელმძღვანელად PayPal-ის ყოფილი CEO დანიშნა
აშშ-ს ახლად არჩეულმა პრეზიდენტმა დონალდ ტრამპმა ე.წ „კრიპტო ცარის“ თანამდებობაზე დევიდ საქსი დანიშნა, რომელიც კომპანია PayPal-ის ყოფილი დამფუძნებლებისგან შემდგარი არაფორმალური გაერთიანების – ე.წ „PayPal მაფიის“ წარმომადგენელია.
დევიდ საქსის (David Sacks) ერთ-ერთი მოვალეობა ციფრული ვალუტების მარეგულირებელ საკანონმდებლო ბაზაზე მუშაობა იქნება. ის პრეზიდენტის მეცნიერებისა და ახალი ტექნოლოგიების საბჭოს უხელმძღვანელებს, პასუხისმგებელი იქნება ინტერნეტ სივრცეში სიტყვის თავისუფლების დაცვაზე და დიდი ტექნოლოგიური კომპანიების მხრიდან მიკერძოებისა და ცენზურის აღმოფხვრაზე.
„ამ მნიშვნელოვან როლში დევიდი ადმინისტრაციის პოლიტიკას ხელოვნური ინტელექტისა და კრიპტოვალუტების სფეროში უხელმძღვანელებს – ორ სფეროს, რომლებიც გადამწყვეტია ამერიკის მომავალი კონკურენტუნარიანობისთვის.“ – თქვა ტრამპმა.
დევიდ საქსი ვენჩურული ფირმა Craft Ventures-ის თანადამფუძნებელი და გენერალური პარტნიორია. მისი პორტფელი BitGo-ს, Bitwise-ს და Lightning Labs-ს მოიცავს. 2018 წლის მარტში იგი ინდუსტრიის მსხვილი ინვესტორის MultiCoin Capital-ის დირექტორთა საბჭოს შეუერთდა.
საქსი ასევე ეგრეთ წოდებული “PayPal მაფიის” წევრია – არაფორმალური გაერთიანებისა, რომელშიც კომპანიის ყოფილი დამფუძნებლები შედიან. ისინი მოგვიანებით მრავალი მსხვილი ფონდისა და კომპანიის დამფუძნებლები და მფლობელები გახდნენ. ისეთების, როგორიცაა: Tesla Motors, LinkedIn, Palantir, SpaceX, YouTube და Yelp.
მანამდე, დონალდ ტრამპმა (Donald Trump) აშშ-ს ფასიანი ქაღალდებისა და ბირჟების კომისიის (SEC) თავმჯდომარის პოსტზე სააგენტოს ყოფილი კომისარი პოლ ატკინსი (Paul Atkins) დანიშნა, რომელიც ქვეყანაში კრიპტო ინდუსტრიის განვითარებას უჭერს მხარს.
- გამოგვეყვით ტელეგრამზე t.me/cryptonewsgeorgia
- დაემატეთ ჩვენს ჯგუფში Fb.me/groups/cryptonewsgeorgia
Comments (No)