ვნანობ, რომ 2011-ში ბიტკოინი არ ვიყიდე პიტერ შიფი

ვნანობ, რომ 2011-ში ბიტკოინი არ ვიყიდე პიტერ შიფი
ოქროს ინვესტორი პიტერ შიფი ვარაუდობს, რომ BTC შეიძლება 100000 დოლარამდე გაიზარდოს და ნანობს,
რომ ის 2011 წელს არ შეიძინა . ამავდროულად, შიფი  ბიტკოინის მიმართ სკეპტიკურ დამოკიდებულებას ინარჩუნებს.

Coin Stories-თან ინტერვიუში შიფმა განაცხადა, რომ ბიტკოინისადმი კვლავაც სიფრთხილეს იჩენს.
კრიპტოვალუტის სკეპტიკოსი დარწმუნებული არ არის, რომ  BTC-ის გადახდის საშუალებად გამოყენება
ოდესმე მასიურად მოხდება. მან გაიხსენა ამერიკული კინოთეატრების ოპერატორის AMC Entertainment-ის
გადაწყვეტილება ბილეთების BTC-ზე გაყიდვის შესახებ. შიფის აზრით, ბიტკოინის მომხრეებსაც კი არ ექნებათ
სურვილი ის ბილეთებზე ან პოპკორნზე დახარჯონ.

ეკონომისტის თქმით, ბიტკოინი გამოუსადეგარი იქნება გაქირავების სექტორისთვისაც, რადგან არცერთი
გამქირავებელი არ დათანხმდება მიიღოს კრიპტოვალუტა, რომლის ფასიც შეიძლება მკვეთრად გაიზარდოს ან
დაეცეს. ამიტომ, ბიტკოინის ერთადერთი ღირებულება ისაა, რომ მისი დახმარებით ადამიანებს საბაზრო
სპეკულაციებზე ფულის შოვნა შეუძლიათ.

შიფმა ხელიდან არ გაუშვა მომენტი კიდევ ერთხელ  გაესვა ხაზი ოქროს უპირატესობისთვის, რომლის გამოყენება  სხვადასხვა სფეროში ხდება – მედლებისთვის ოლიმპიურ თამაშებზე, ელექტრონიკის დასამზადებლად და კოსმოსურ ინდუსტრიაშიც კი.  ოქრო გადახდის საშუალებად  უხსოვარი დროიდან გამოიყენება და ეს ბიტკოინთან მიმართებაში მის კიდევ ერთ უპირატესობად შეიძლება ჩაითვალოს, დაამატა შიფმა.

მიუხედავად ამისა, მან აღიარა, რომ დაარსების დღიდან ბიტკოინი ერთ-ერთი ყველაზე მომგებიანი აქტივი გახდა. შიფის გათვლებით, ბოლო ათწლეულის განმავლობაში, ბიტკოინში ინვესტირების რენტაბელობამ 8 900 000% შეადგინა, რაც ოქროს მაჩვენებელს მნიშვნელოვნად აღემატება. ის ვარაუდობს, რომ ბიტკოინს შეუძლია შთამბეჭდავი ზრდა აჩვენოს და 100 000$-ს მიაღწიოს, შორეულ პერსპექტივაში კი სულაც 1 მილიონ დოლარს მიუახლოვდეს.

„ვნანობ რომ არ შევიძინე ბიტკოინი, როდესაც მის შესახებ პირველად გავიგე. დიდი შეცდომა დავუშვი. შემეძლო 100000$-ის კრიპტოვალუტა მეყიდა, მაგრამ ეს თანხა სხვა რამეში ჩავდე, რაც არც თუ ისე მომგებიანი გამოდგა. ანდა შემეძლო ახლა კრიპტოვალუტის მილიარდერი ვყოფილვიყავი. წარსულში დაბრუნება რომ შემეძლოს, ამას აუცილებლად გავაკეთებდი.“ – თქვა შიფმა.

ეკონომისტი პირველი კრიპტოვალუტის შესახებ აზრს რადიკალურად იცვლის. გასულ წელს ის ამტკიცებდა, რომ ათი წლის შემდეგ ბიტკოინი გაუფასურდება, მისი კურსი კი ვერ შეძლებს 9000$-ს გასცდეს.

წყარო: https://bits.media

ვნანობ რომ 2011-ში ბიტკოინი არ ვიყიდე პიტერ შიფი