NFT შესაძლოა ბიტკოინზე მოთხოვნადი გახდეს

NFT შესაძლოა ბიტკოინზე მოთხოვნადი გახდეს

ბიზნესმენი და თოქ-შოუ Shark Tank-ის  ვარსკვლავი კევინ ო’ლირი მიიჩნევს, რომ NFT შესაძლოა ბიტკოინზე მოთხოვნადი გახდეს. თუმცა, BTC-ის ყიდვაზე უარს არ ამბობს.

ინვესტორ კევინ ო’ლირის (Kevin O’Leary) არაურთიერთჩანაცვლებადი ტოკენების პოტენციალის მტკიცედ სჯერა.

საკუთარი პოზიცია მან იმით ახსნა, რომ NFT-ს მფლობელებს რეალურ ნივთებზე საკუთრების უფლების დამტკიცება, იქნება ეს დიზაინერული საათები თუ ძვირადღირებული მანქანები,  ციფრულად, ქაღალდის დოკუმენტების გამოყენების გარეშე შეუძლიათ.

ო’ლირი ვარაუდობს, რომ მომდევნო რამდენიმე წელიწადში საკოლექციო ტოკენები უფრო ფართოდ გამოყენებადი გახდება.

მაგალითად, NFT შეიძლება გამოყენებულ იქნას პირადობის დამადასტურებელი დოკუმენტების გასაცემად, სადაზღვევო და უძრავი ქონების ხელშეკრულებების გასაფორმებლად. მეწარმის თქმით, ეს NFT-ს ბაზარს ბიტკოინთან შედარებით ბევრად უფრო ფართოს და ლიკვიდურ გახდის.

„დრო გვიჩვენებს, მოხდება თუ არა ეს, მაგრამ მე ფსონს ორივე მხარეზე დავდებ. მე გავაგრძელებ  NFT-სა და Bitcoin-ში ინვესტირებას. გამარჯვებული ნებისმიერი მათგანი შეიძლება გახდეს.“- თქვა ო’ლირიმ.

 2021 წელს NFT-ის გარშემო აჟიოტაჟი გაიზარდა. DappRadar-ის მონაცემებით, გასული წლის მესამე კვარტალში საკოლექციო ტოკენების გაყიდვები  10,7 მილიარდ დოლარამდე გაიზარდა, რაც წინა კვარტალის მონაცემებს რვაჯერ აღემატება.

თუმცა, NFT-ს განვითარებასთან ერთად გახშირდა ინდუსტრიაში თაღლითობის შემთხვევები.

ცოტა ხნის წინ ციფრული ხელოვნების მოყვარული ფიშინგის თავდასხმის მსხვერპლი გახდა, მას 2,2 მილიონი დოლარის ღირებულების 16 NFT მოპარეს.

ო’ლირი კრიპტოვალუტის მხარდამჭერი ყოველთვის არ იყო. რამდენიმე წლის წინ მან ბიტკოინს  „ნაგავი და უსარგებლო ვალუტა“ უწოდა.

თუმცა შემდეგ ო’ლირი ციფრული აქტივებით დაინტერესდა და მათ მიმართ ლოიალური გახდა, რადგან მათი გამოყენება  საინვესტიციო პორტფელის დივერსიფიკაციისთვის იყო შესაძლებელი.

შემოდგომაზე, ბიზნესმენმა მხარდაჭერა  DeFi-ს გამოუცხადა და დეცენტრალიზებულ ფინანსებს  ტრადიციული ფინანსური სისტემის ბლოკჩეინზე მომუშავე ანალოგი უწოდა.

ო’ლირის თქმით,  BTC-ის გარდა, მისი კრიპტოვალუტის პორტფელი ETH, SOL და MATIC-ს მოიცავს.

წყარო: https://bits.media/