by shaksen 
DFG-ის დირექტორი: Bitcoin-ის ახალი ისტორიული მაქსიმუმი შესაძლოა 2027-2028 წლებში დაფიქსირდეს
DFG-ის აღმასრულებელი დირექტორის, ჯეიმს ვოს (James Wo) განცხადებით, Bitcoin-ს (BTC) ახალი ისტორიული მაქსიმუმის მიღწევა 2027 ან 2028 წელს შეუძლია, თუმცა მანამდე ბაზარზე მნიშვნელოვანი კორექციაა მოსალოდნელი.
პარიზში გამართულ კრიპტოკონფერენცია Proof of Talk-ზე გამოსვლისას, DFG-ის ხელმძღვანელმა აღნიშნა, რომ Bitcoin კვლავ რჩება კრიპტოვალუტების ბაზრის მთავარ აქტივად და მისი პოზიციები სულ უფრო მყარდება როგორც კრიპტოინდუსტრიაში, ისე ტრადიციულ ფინანსურ სექტორში.
ვოს შეფასებით, Bitcoin-ის ფასი მოკლევადიან პერიოდში შესაძლოა $60,000-$62,000 დიაპაზონამდე შემცირდეს, თუმცა გრძელვადიანი პერსპექტივა კვლავ პოზიტიურია.
„მტკიცედ მჯერა, რომ Bitcoin-ი როგორც ჩინურ, ასევე ამერიკულ საფონდო ბაზრებს აჯობებს. საინვესტიციო თვალსაზრისით, მისი ლიკვიდურობა მსოფლიოში ერთ-ერთი საუკეთესოა. მიმდინარე ციკლის პიკზე შესაძლოა დაახლოებით $125,000 ვიხილოთ. ვფიქრობ, ახალი ისტორიული მაქსიმუმი 2027 ან 2028 წელს დაფიქსირდება,“ — განაცხადა ჯეიმს ვომ.
რატომ რჩება Bitcoin ინსტიტუციური ინვესტორების ფავორიტად?
DFG-ის დირექტორის თქმით, Bitcoin-მა უკვე დიდი ხანია გასცდა მხოლოდ კრიპტოენთუზიასტების ინტერესების სფეროს და დღეს მას ტრადიციული ფინანსური ინსტიტუტებიც აღიქვამენ, როგორც ღირებულების შესანარჩუნებელ აქტივს და დამოუკიდებელ აქტივების კლასს.
მისი თქმით, ადრეული მხარდამჭერები კვლავ აქტიურად უჭერენ მხარს Bitcoin-ს, თუმცა მნიშვნელოვანი ცვლილება ისაა, რომ ახლა მის მიმართ ინტერესი ბანკებსა და პროფესიონალ ინვესტორებსაც აქვთ.
Ethereum-ს ახალი რეკორდის დამყარება გაუჭირდება?
ჯეიმს ვომ ასევე შეაფასა Ethereum-ის პერსექტივებიც. მისი აზრით, მეორე უმსხვილეს კრიპტოვალუტას უახლოეს წლებში ისტორიული მაქსიმუმის განახლება გაუჭირდება.
ამის ერთ-ერთ მთავარ მიზეზად მან Layer-2 გადაწყვეტილებების მზარდი პოპულარობა დაასახელა, რომლებიც Ethereum-ის ძირითადი ქსელიდან მომხმარებლებსა და საკომისიო შემოსავლებს იზიდავენ.
ვოს განცხადებით, Ethereum-ის ქსელში არსებული ონჩეინ აქტივობა ჯერ კიდევ ვერ ამართლებს იმ მოლოდინებს, რომლებიც ბაზრის მონაწილეებს ჰქონდათ.
Bitcoin-ის ბაზარი ფსკერს უახლოვდება?
მანამდე, Standard Chartered-ის ციფრული აქტივების კვლევის დეპარტამენტის ხელმძღვანელმა ჯეფ კენდრიკმა (Geoff Kendrick) განაცხადა, რომ Bitcoin-ის ბაზარი შესაძლოა უკვე ფსკერთან ახლოს იყოს და უარყოფითი ფაზის ყველაზე რთული ნაწილი მალე დასრულდეს.
კრიპტობაზრის მონაწილეები ყურადღებით აკვირდებიან როგორც მაკროეკონომიკურ გარემოს, ისე ინსტიტუციური კაპიტალის ნაკადებს, რომლებიც Bitcoin-ის მომდევნო ციკლის მთავარი მამოძრავებელი ძალა შეიძლება გახდეს.
