კრიპტობაზარმა გასულ დღე-ღამეში 100 მილიარდი დაკარგა

კრიპტობაზარმა გასულ დღე-ღამეში 100 მილიარდი დაკარგა

გასული 24 საათის განმავლობაში კრიპტოვალუტის ბაზრის კაპიტალიზაცია თითქმის 4%-ით – დაახლოებით 100 მილიარდი დოლარით შემცირდა. ანალიტიკოსები ბაზრის დაცემას უკრაინაში მიმდინარე რუსეთის ომს უკავშირებენ.

გამოცემა Decrypt-ის ცნობით, ერთ დღეში კრიპტო ინდუსტრიის საბაზრო კაპიტალიზაციის 4%-ით დაცემასთან ერთად, 4%-ით დაეცა ბიტკოინის ფასიც – 44,000 დოლარიდან 41,000 დოლარამდე. 5%-ით დაეცა ETH -ის ფასიც, მიუხედავად იმისა, რომ ხუთშაბათს ნაშუადღევს მისი ფასი 3,000 დოლარამდე ავარდა. დღეს ETH-ის კურსი 2,700 დოლარს შეადგენს.

ბოლო 24 საათის განმავლობაში სხვა კრიპტოვალუტების ფასებიც შემცირდა.

Solana-ს ფასი 6,8%-ით დაეცა და ახლა 92 დოლარზე ოდნავ მეტი ღირს. Polkadot-ისა და Avalanche-ს – ეგრეთ წოდებული „ეთერიუმის მკვლელების“ ფასი გასული დღე-ღამის განმავლობაში დაახლოებით 3,5% -ით დაეცა. 

ფასების ვარდნა უკრაინაში განვითარებულ მოვლენებს უკავშირდება, რომელთა შედეგად კრიპტობირჟებს მოუწოდებენ დაბლოკონ რუსი მომხმარებლების ანგარიშები.

აშშ-ს პრეზიდენტობის ყოფილი კანდიდატის, ჰილარი კლინტონის განცხადებთ, ის იმედგაცრუებულია იმ კრიპტო ბირჟებით, რომლებმაც რუსი მომხმარებლებისთვის წვდომის შეზღუდვაზე  უარი თქვა.

 ცნობილია, რომ კრიპტო ბირჟები Kraken, Binance და Coinbase ამ დრომდე რუსეთის მოქალაქე კლიენტების დაბლოკვაზე უარს აცხადებენ. თუმცა, ზოგიერთმა ბირჟამ განაცხადა, რომ სანქციებს დაიცავენ, თუ ისინი გარკვეულ პირებზე გავლენას მოახდენს.