უკრაინამ ვირტუალური აქტივების შესახებ“კანონი მიიღო

უკრაინამ „ვირტუალური აქტივების შესახებ“კანონი მიიღო

უკრაინის ხელისუფლებამ მიიღო კანონი, რომელმაც  კრიპტოვალუტების მიმოქცევა და გამოყენება უნდა დაარეგულიროს.

თებერვალში უკრაინის უმაღლესმა რადამ დაამტკიცა კანონი „ვირტუალური აქტივების შესახებ“, ხოლო ოთხშაბათს, 16 მარტს, უკრაინის ციფრული ტრანსფორმაციის სამინისტრომ გამოაცხადა, რომ პრეზიდენტმა ვოლოდიმირ ზელენსკიმ მას ხელი მოაწერა.

კანონი უკრაინის ტერიტორიაზე კრიპტოვალუტების ლეგალური გამოყენების პირობების შექმნას ისახავს მიზნად.

ციფრული აქტივების ბაზრის რეგულირებაზე პასუხისმგებელნი უკრაინის ფასიანი ქაღალდებისა და საფონდო ბაზრის ეროვნული კომისია (NSSMC) და უკრაინის ეროვნული ბანკი (NBU) იქნებიან.

კანონი  ვირტუალური აქტივების სამართლებრივ სტატუსს და მათზე საკუთრების უფლებას განსაზღვრავს, ადგენს რეგისტრაციის მოთხოვნებს ვირტუალური აქტივების სერვისის პროვაიდერებისთვის (VASP) და ტრანზაქციის მონიტორინგს ითვალისწინებს.

ფასიანი ქაღალდებისა და საფონდო ბაზრის ეროვნული კომისია ქვეყანაში ციფრული აქტივების მიმოქცევის წესს დაადგენს და საქმიანობის განსახორციელებლად VASP ლიცენზიებს გასცემს. 

კრიპტოაქტივებთან მიმართებაში სახელმწიფო პოლიტიკის ფორმირება და განხორციელება ასევე დეპარტამენტის მოვალეობებში შევა. მანამდე უკრაინის ციფრული განვითარების სამინისტრო ამ სფეროში რეგულირების შემუშავებით იყო დაკავებული.

ახლა ციფრული განვითარების სამინისტრო ვირტუალური აქტივების სრული დანერგვის მიზნით საგადასახადო და სამოქალაქო კოდექსში ცვლილებებზე იმუშავებს. კანონი „ვირტუალური აქტივების შესახებ“ საგადასახადო კოდექსში ცვლილებების შეტანის შემდეგ ამოქმედდება.

„უკრაინამ  კრიპტოვალუტის სექტორი დააკანონა – ვოლოდიმირ ზელენსკიმ  შესაბამის კანონს მოაწერა ხელი. ახლა უცხოური და უკრაინული კრიპტოვალუტის ბირჟები ლეგალურად იმუშავებენ და ბანკებს მათთვის ანგარიშების გახსნა შეეძლებათ. ეს   უკრაინაში ვირტუალური აქტივების ბაზრის განვითარებისკენ მნიშვნელოვანი ნაბიჯია.“ – წერს უკრაინის ციფრული ტრანსფორმაციის სამინისტრო Twitter-ზე.

უკრაინის ვიცე-პრემიერმა და ციფრული ტრანსფორმაციის მინისტრმა მიხაილო ფედოროვმა დაამატა, რომ საომარი მოქმედებების დაწყების შემდეგ, კრიპტო აქტივები ძლიერი ფინანსური ინსტრუმენტი გახდა, რომელიც შეიარაღებულ ძალებს დამატებითი დაფინანსების მოზიდვაში დაეხმარა.

ბოლო სამი კვირის განმავლობაში უკრაინის კრიპტოვალუტის ფონდმა 54 მილიონ დოლარზე მეტი ციფრული აქტივები შეაგროვა.ხელმოწერილი კანონი კრიპტოვალუტის სექტორს „ჩრდილიდან გამოიყვანს“ განაცხადა ფედოროვმა.

 კრიპტოვალუტების ლეგალიზაციის წინადადებით ფედოროვი ჯერ კიდევ 2019 წელს გამოდიოდა. 2020 წელს უკრაინის ეროვნულმა ანტიკორუფციულმა ბიურომ (NAPC) კრიპტოვალუტების არამატერიალურ აქტივებად დეკლარირების წესები შემოიღო.