უკრაინაში კონფლიქტმა შესაძლოა კრიპტოვალუტის მიღება დააჩქაროს

უკრაინაში კონფლიქტმა შესაძლოა კრიპტოვალუტის მიღება დააჩქაროს

აქტივების მართვის კომპანია BlackRock-ის აღმასრულებელი დირექტორი მიიჩნევს, რომ უკრაინაში სამხედრო მოქმედებები და  რუსეთის წინააღმდეგ მიღებული სანქციბი კრიპტოვალუტების პოპულარობას გაზრდის.

ლარი ფინკი (Larry Fink) BlackRock-ის აქციონერებისადმი თავის ყოველწლიურ წერილში ხაზგასმით აღნიშნავს, რომ  აღმოსავლეთ ევროპაში კონფლიქტი გლობალიზაციის დასასრულის ნიშანია. ახლა ფართომასშტაბიანი ეკონომიკური სანქციების საფრთხის ქვეშ ბევრი ქვეყანა ეძებს შესაძლებლობას თავისი დამოუკიდებლობის ხარისხი გაზარდოს. ამან მიწოდების ჯაჭვების და გადახდის სისტემების მასიური ცვლილება უნდა გამოიწვიოს და დიდი ალბათობით, ციფრულ ვალუტებს უფრო პოპულარულს გახდის.

ახლა მსოფლიოს ქვეყნების აბსოლუტური უმრავლესობა საერთაშორისო ფინანსური ტრანზაქციებისთვის აშშ დოლარს იყენებს.

თუმცა, უკრაინაში მიმდინარე მოვლენები მათ აიძულებს თავიანთი ეკონომიკისა და ფინანსური ნაკადების უცხოურ ვალუტაზე დამოკიდებულება შეაფასონ.

„ჯერ კიდევ საომარი მოქმედებების დაწყებამდე, ზოგიერთმა სახელმწიფომ გამოიკვლია და შეიმუშავა ციფრული ვალუტები და მათი მუშაობის მარეგულირებელი ბაზა. გლობალურ ციფრული გადახდის სისტემას, თუ ის სწორად არის შემუშავებული, შეუძლია  საერთაშორისო გადახდები გამჭვირვალე გახადოს, ფულის გათეთრების და კორუფციის რისკები შეამციროს. ციფრულ ვალუტას საერთაშორისო ტრანზაქციების ღირებულების შემცირებაც შეუძლია.“ – ამბობს ლარი ფინკი.

BlackRock-ის ხელმძღვანელის განცადებით,  კომპანია, რომელიც 10 ტრილიონი დოლარის აქტივებს განაგებს, კრიპტოვალუტებისა და სტეიბლკოინების მიმართ მისი კლიენტების მზარდ ინტერესს ხედავს.

ამიტომ, BlackRock ციფრულ ვალუტებს, ასევე  მათი შექმნისა და ექსპლუატაციისთვის ტექნოლოგიებს სწავლობს.

იანვრის ბოლოს, BlackRock-მა, თავისი შვილობილი კომპანიის iShares-ის მეშვეობით სავაჭრო ფონდი აამოქმედა, რომელიც თვალყურს ადევნებს „კომპანიების აქციებს ბლოკჩეინისა და კრიპტოვალუტების სფეროში“.