FTX-მა ბიტკოინის სავაჭრო მოცულობით Coinbase-ს გაუსწრო

 FTX-მა ბიტკოინის სავაჭრო მოცულობით Coinbase-ს გაუსწრო

ანალიტიკური კომპანია Kaiko-ს ცნობით, კრიპტოვალუტის ბირჟამ FTX მაისში ბიტკოინით ვაჭრობის მოცულობით კონკურენტ Coinbase-ს აჯობა.

თუმცა ანგარიშის თანახმად, Coinbase-ს კვლავ შეუძლია ტრანზაქციების რეკორდული რაოდენობით იამაყოს. ვაჭრობის მოცულობისა და ტრანზაქციების რაოდენობის შეუსაბამობა იმაზე მიუთითებს,

რომ Coinbase-ზე თითო გარიგებაზე დოლარის საშუალო ღირებულება უფრო დაბალი იყო, ვიდრე FTX-ზე. FTX-ზე კი გარიგებების საშუალო მოცულობა თითქმის ორჯერ მაღალი, ვიდრე Coinbase-ზე.

ექსპერტებმა ასევე გასული 18 თვის განმავლობაში FTX-ის ზრდას გაუსვეს ხაზი –  ბირჟამ ბაზრის წილი 5%-დან 44%-მდე გაზარდა.

სხვა ბირჟებმა, როგორიცაა Bitfinex და Bitstamp, პირიქით, ამ პერიოდში წილები დაკარგეს.

Coinbase-მა  დაახლოებით იმავე დონეზე დარჩენა მოახერხა. ექსპერტები აღნიშნავენ, რომ ბოლო რამდენიმე თვის განმავლობაში კრიპტოვალუტის მცირე კომპანიებისთვის  სხვა მოთამაშეებთან კონკურენცია უფრო რთული იყო, რადგან ბაზარზე არსებული მდგომარეობა დიდ რესურსებს მოითხოვს.

გარდა ამისა, Coinbase Premium – ინდიკატორი, რომელიც Coinbase-სა და Binance-ზე BTC/USD წყვილში ბიტკოინის ფასების საათობრივ სხვაობას აჩვენებს – მაისში უარყოფითი გახდა მას შემდეგ, რაც თითქმის ექვსი თვის განმავლობაში დადებითი იყო.

”ეს მეტრიკა ზოგჯერ განიხილება, როგორც ინსტიტუციური განწყობის საზომი, რადგან ინსტიტუციური ვაჭრობის მოცულობა Coinbase-ზე სავაჭრო აქტივობის 76%-ზე მეტს შეადგენს.“- ნათქვამია მოხსენებაში.

ექსპერტების აზრით, ბაზრის სტრუქტურის ცვლილების ერთ-ერთი მთავარი მიზეზი  სტეიბლკოინ Tether-ის მუდმივი არასტაბილურობა იყო. მანამდე დიდი ბრიტანეთის ფინანსური ზედამხედველობის სამსახურის (FCA) აღმასრულებელმა დირექტორმა, სარა პრიჩარდმა (Sarah Pritchard)  კრიპტო ბაზრებზე არასტაბილურობის შესწავლის აუცილებლობის შესახებ განაცხადა.