დეველოპერებმა თეთრ ჰაკერს 6 მილიონი  გადაუხადეს  

დეველოპერებმა თეთრ ჰაკერს 6 მილიონი  გადაუხადეს

 ბლოკჩეინ Aurora-ს დეველოპერების განცხადებით, „თეთრმა ჰაკერმა“ ფსევდონიმით „pwning.eth“ 70,000 ETH-ის ქურდობის თავიდან აცილებაში დახმარებისთვის მათგან 6 მილიონი დოლარის ჯილდო მიიღო.

Aurora-ს დეველოპერებმა Twitter-ში განაცხადეს, რომ პირველად თეთრი ჰაკერი მათ აპრილში პლატფორმა Immunefi-ს მეშვეობით დაუკავშირდა.

ქსელში ხარვეზის დროული აღმოჩენისა და აღმოფხვრის შედეგად თანხები უსაფრთხოდ შეინახა.

ამასთან, თუ ახლა 70,000 ETH 122 მილიონი დოლარი ღირს, იმ მომენტში მათი ღირებულება 210 მილიონს შეადგენდა.

ამიტომ, Aurora-ს დეველოპერებმა გადაწყვიტეს „თეთრი ჰაკერისთვის“ 6 მილიონი დოლარი გადაეხადათ. ეს ხარვეზის აღმოჩენისთვის გადახდილი სიდიდით მეორე ჯილდოა.

 ინფლაციური საფრთხე Aurora Engine-ში იქნა აღმოჩენილი, Ethereum-ის ვირტუალურ მანქანასთან (EVM) თავსებად გარემოში, რომელიც NEAR Protocol-ის ბაზაზეა აგებული. მისი საშუალებით მომხმარებლებს Ethereum-ისა და ERC-20 ტოკენების ძირითადი Ethereum ქსელიდან NEAR ქსელში დეპონირება შეუძლიათ.

სისტემაში არსებული დაუცველობის გამო, ჰაკერებს Aurora-დან დაახლოებით 70,000 ETH-ის გამოტანა შეეძლოთ.

„Immunefi -ზე არსებულმა ჩვენმა შეცდომების ამომცნობმა პროგრამამ თავი საუკეთესოდ წარმოაჩინა. ის ჰაკერებს ახალისებს   შეისწავლონ ჩვენი კოდების ბაზა და  შეცდომებისა და ხარვეზების შესახებ შეგვატყობინონ.

ასეთი სახის ხარვეზი უფრო ადრე უნდა გამოვლენილიყო და ჩვენ უკვე მივიღეთ ზომები შეცდომების განვითარების ადრეულ ეტაპებზე გამოსავლენად. მაგრამ ეს შემთხვევა გვაჩვენებს, რომ ჩვენი უსაფრთხოების სისტემა მუშაობს.“- განაცხადა Aurora-ს უსაფრთხოების ხელმძღვანელმა ფრენკ ბრაუნმა (Frank Braun).