ირანი მაინინგისთვის ლიცენზიების გაცემას განაახლებს

ირანი მაინინგისთვის ლიცენზიების გაცემას განაახლებს

ირანის მთავრობამ ციფრული აქტივების ტრანზაქციებთან დაკავშირებული ახალი მარეგულირებელი ჩარჩოს შესაბამისად კრიპტოვალუტის მაინერებისთვის ლიცენზიების გაცემა განაახლა.

ირანის მრეწველობისა და ვაჭრობის მინისტრის რეზა ფატემი ამინის (Reza Fatemi Amin) განაცხადებით, კრიპტო აქტივების წარმოებაში ჩართულ ორგანიზაციებს  თავიანთი საქმიანობისთვის ნებართვის მოთხოვნა კვლავაც შეეძლებათ.

ამას ხელი გასულ კვირას დამტკიცებულმა კრიპტოვალუტების შესახებ ყოვლისმომცველმა კანონმა შეუწყო, რომელიც  მაინინგის შესახებ მუხლებსაც მოიცავს.

ამინის განმარტებით, ირანში მაინინგის დაწყებისთვის ორგანიზაციას ორი სახის ლიცენზიის მოპოვება დასჭირდება: ერთის დაწესებულებისთვის, სადაც მაინინგს განახორციელებს, მეორის კი უშუალოდ საქმიანობისთვის.

 კრიპტოვალუტის სფეროში სამთავრობო სამუშაო ჯგუფის მდივნის, მოჰსენ რეზაეი სადრაბადის (Mohsen Rezaei Sadrabadi) განცხადებით,  კრიპტოვალუტის სექტორის მთავარი მარეგულირებელი ირანის ცენტრალური ბანკი გახდება.

ამავდროულად, სადრაბადიმ აღნიშნა, რომ ინდუსტრიას რამდენიმე მარეგულირებელი უნდა აკონტროლებდეს, რადგან კრიპტოვალუტის ეკოსისტემა გაცილებით მეტია, ვიდრე უბრალოდ ციფრული აქტივები.

ირანმა მაინინგზე შეზღუდვები არაერთხელ დააწესა. 2021 წლის მაისში ქვეყანამ  კრიპტოვალუტის მაინინგზე ოთხთვიანი აკრძალვა შემოიღო, რომელიც სექტემბერში მოიხსნა.

თუმცა 2021 წლის დეკემბერში, ამინდის ექსტრემალური პირობებისა და ელექტროენერგიის მაღალი მოხმარების გამო,

ირანის მარეგულირებლებმა მაინინგის დროებითი აკრძალვა კვლავ აღადგინეს, მათ შორის ლიცენზირებული კომპანიებისთვისაც. 

იმავე წლის ივნისში ირანის სამართალდამცავმა ორგანოებმა არალეგალური მაინინგ ფერმიდან 7000-მდე მოწყობილობის ამოღება მოახდინეს, რაც ქვეყანაში სამაინინგო აღჭურვილობის ყველაზე დიდი კონფისკაცია იყო.