ბრიტანეთი კრიპტოვალუტის კონფისკაციიას ამარტივებს

ბრიტანეთი კრიპტოვალუტის კონფისკაციიას ამარტივებს

დიდი ბრიტანეთის მთავრობა კრიპტო დანაშაულებებთან საბრძოლველად ხელისუფლების უფლებამოსილების გაფართოებას აქტივების ჩამორთმევისა და გაყინვის პროცედურების გამარტივებით გეგმავს.

გაერთიანებული სამეფოს პარლამენტი კონფიდენციალურობის პრობლემების აღმოფხვრის შესახებ კანონპროექტს განიხილავს, 

რომელიც სამართალდამცავ ორგანოებს უფლებას მისცემს ბიზნესს კრიპტოაქტივების გამოყენებით სავარაუდოდ ფულის გათეთრებასთან ან ტერორიზმის დაფინანსებასთან დაკავშიებული ინფორმაციის გადაცემა მოსთხოვოს.

კანონპროექტის მიხედვით, ეკონომიკური დანაშაულების გამოძიებისას, სამართალდამცავი ორგანოები  კონფიდენციალურობის დაცვის ვალდებულებასთან დაკავშირებული ბიუროკრატიული პროცედურებისგან გათავისუფლდებიან.

ეკონომიკური დანაშაულის გამოვლენისა და პრევენციის მიზნით გაერთიანებული სამეფოს კერძო კომპანიებს სახელმწიფოსთვის ინფორმაციის ოპერატიულად გაზიარება დაევალებათ. შინაგან საქმეთა მინისტრი სუელა ბრავერმანი (Suella Braverman) განმარტავს:

„ახალი კანონის დახმარებით, ჩვენ სამართალდამცავ ორგანოებს შესაძლებლობას მივცემთ კრიმინალებზე ერთი ნაბიჯით წინ იყვნენ. კანონი გაამარტივებს და დააჩქარებს ბრძოლას ორგანიზებულ დანაშაულთან, რომელიც ციფრულ ვალუტებს თაღლითობის, ნარკოვაჭრობისა და კიბერდანაშაულის შედეგად მიღებული შემოსავლების გასათეთრებლად იყენებს.“

გარდა ამისა, კრიპტოვალუტით თაღლითობის, ფულის გათეთრებისა და ტერორიზმის დაფინანსების საქმეებზე მუშაობისას სამართალდამცავ ორგანოებს კრიპტოაქტივების გაყინვისა და ჩამორთმევის უფლება დამატებითი ადმინისტრაციული ფორმალობების გავლის გარეშე ექნებათ.

2021 წელს ბრიტანულმა პოლიციამ 294 მილიონი ფუნტი სტერლინგის (დაახლოებით 331 მილიონი აშშ დოლარი) ღირებულების კრიპტოვალუტის კონფისკაცია მოახდინა,

რაც ბრიტანეთის ისტორიაში  უმსხვილეს, ხოლო მსოფლიოში ერთ-ერთ ყველაზე დიდ  მსგავსი სახის კონფისკაციას წარმოადგენს.