სახელმწიფო ციფრულ ვალუტას მხარს არასოდეს დავუჭერ

ჩარლზ ჰოსკინსონი: სახელმწიფო ციფრულ ვალუტას მხარს არასოდეს დავუჭერ

Cardano-ს დამფუძნებელის თქმით,  ის არასოდეს დაუჭერს მხარს სახელმწიფო საკუთრებაში არსებულ ციფრულ ვალუტას, რომელიც მისი მფლობელის კონფიდენციალურობას არღვევს.

ADA-ს შემქმნელ ჩარლზ ჰოსკინსონს მიაჩნია, რომ სამთავრობო ციფრული ვალუტა (CBDC) „მონეტარულ პოლიტიკაში არსებული ყველაზე საშიში ინოვაციაა“:

„CBDC არ არის კრიპტოვალუტა. ცენტრალური ბანკის ციფრულ ვალუტებს შეუძლიათ იმუშაონ კრიპტო რელსებზე და იგივე ფუნქციონირება ჰქონდეთ, მაგრამ მე მათ ცხოვრებაში  მხარს არასდროს დავუჭერ. ეს არის ფინანსური სისტემა, სადაც ჩვენ  სრულ კონტროლს, შეუზღუდავ მონოპოლიას და ჩვენს ფინანსურ ავტონომიაზე სრულ წვდომას სახელმწიფოს გადავცემთ.“

სახელმწიფო ციფრული ვალუტიდან მომდინარე საფრთხის დემონსტრირებისთვის ჰოსკინსონმა ორი დაპირისპირებული მხარის ბრძოლის მაგალითი გამოიყენა:

„დავუშვათ, რომ ქვეყანაში ორ ეთნიკურ ჯგუფს შორის სამოქალაქო ომია. უმრავლესობის პარტიას, რომელიც მხარს CBDC-ს მაკონტროლებელ მთავრობას უჭერს და ეთნიკურ უმცირესობას ჩაგრავს, შეუძლია ოპონენტების მთელი ფული დაბლოკოს.“- ამბობს ჰოსკინსონი.

ჰოსკინსონი გვაფრთხილებს, რომ სახელმწიფო ციფრული ვალუტის ტრანზაქციების მუდმივმა ჩანაწერმა შესაძლოა მომხმარებლის კონფიდენციალურობა გაანადგუროს.

ის შესაძლოა ცენზურისა და შევიწროვების საფრთხის ქვეშ აღმოჩნდეს, თუ ოდესმე ისეთ საქონელს შეიძენს რომელიც  მთავრობის მიერ არ არის ნებადართული.

ცოტა ხნის წინ, ამერიკული კვლევითი ცენტრის Bitcoin Policy-ის ანალიტიკოსებმა  აშშ-ს ხელისუფლებას მოუწოდეს, სახელმწიფო კრიპტოვალუტის განვითარებაზე  სტეიბლკოინებისა და ბიტკოინის სასარგებლოდ უარი თქვან.

გასულ თვეში, აშშ-ს ფედერალური რეზერვის საბჭოს წევრმა კრისტოფერ უოლერმა (Christopher Waller) განაცხადა, რომ ის CBDC-ების გარშემო არსებულ ზოგად ეიფორიას არ იზიარებს  და სჯერა,

რომ კერძო სტეიბლკოინებს ციფრული ვალუტის ფუნქციის შესრულება უკეთესად შეუძლიათ. 

ამ თვეში, აშშ-ს წარმომადგენელთა პალატის ფინანსური მომსახურების კომიტეტმა, რომელიც  ციფრული იუანის მზარდი გავლენის გამო ფრთხილობდა, ამერიკული ციფრული დოლარის განვითარებას მისცა ხმა.