149 ETH თურქეთში მიწისძვრის შედეგად დაზარალებულებს

149 ETH თურქეთში მიწისძვრის შედეგად დაზარალებულებს

Ethereum-ის თანადამფუძნებელმა ვიტალიკ ბუტერინმა თურქეთში მიწისძვრის შედეგად დაზარალებულთა დასახმარებლად საქველმოქმედო ორგანიზაციებს საერთო ჯამში 227,000 აშშ დოლარის ღირებულების ETH გადაურიცხა.

გასულ კვირას თურქეთში 7,8 მაგნიტუდის სიმძლავრის მიწისძვრის შედეგად  დაღუპულთა რიცხვმა 33 000-ს გადააჭარბა.

მომხდარის გამო ნხარდაჭერა ბევრმა კრიპტოვალუტის კომპანიამ და ბირჟამ გამოხატა და დაზარალებულთა დასახმარებლად შემოწირულობები კრიპტო აქტივების სახით გამოყო. მათ შორის არის Ethereum-ის თანადამფუძნებელი ვიტალიკ ბუტერინიც.

ანალიტიკური კომპანია PeckShield-ის ცნობით, 12 თებერვალს მან კრიპტოვალუტის ფონდ Anka Relief-ის ანგარიშზე 50 ETH (დაახლოებით 77,000$) გადარიცხა.

ფონდის ხელმძღვანელობამ ბუტერინს და ყველა კრიპტოვალუტის კომპანიას, რომლებმაც თანხები გაიღეს მადლობა გადაუხადა.

Anka Relief-ის განცხადებით, არასამთავრობო ორგანიზაციების ანგარიშებზე კრიპტოვალუტაში შემოწირულობების მიღება სტიქიის პირველივე დღიდან მიმდინარეობს. ფონდმა იმ მისამართების სია გამოაქვეყნა, რომლებზეც შემოწირულობის გადარიცხვა კრიპტოვალუტის სახით არის შესაძლებელი.

მანამდე, 11 თებერვალს, ბუტერინის მისამართიდან 99 ETH (150,000 აშშ დოლარი) არაკომერციულ ორგანიზაცია Ahbap-ის ანგარიშზე გაიგზავნა, რომელიც დახმარებას თურქეთის დაზარალებულ მოსახლეობას უწევს.

Ahbap-ის განცხადებით, ორგანიზაციამ უკვე 4,3 მილიონი დოლარის ციფრული აქტივები  მიიღო. შემოწირულობების უმეტესობა სტეიბლკოინებში შემოდის. Etherscan-ის თანახმად, Ahbap-ის საფულეში ამჟამად 409 ETH-ია, რაც დაახლოებით 622,000 აშშ დოლარს შეადგენს.

ვიტალიკ ბუტერინი დარწმუნებულია, რომ კრიპტოვალუტების გამოყენება მხოლოდ კარგი მიზნებისთვის უნდა მოხდეს. 2021 წელს მან მიმ-კოინების მთელი თავისი მარაგი გაყიდა და შემოსული 15,719 ETH საქველმოქმედო ორგანიზაციებს, მათ შორის კორონავირუსის წინააღმდეგ ბრძოლის ფონდს, მთლიანად გადასცა.

ეს არ არის პირველი შემთხვევა, როცა კრიპტოვალუტების მეშვეობით სტიქიური უბედურებებით დაზარალებული ადამიანების დახმარება ხდება.

მაგალითად, 2015 წელს მაინერების მწარმოებელმა BitFury-მ ქართულ საინვესტიციო ფონდთან ერთად თბილისში წყალდიდობის შედეგად დაზარალებულთა დასახმარებლად შემოწირულობების ბიტკოინში შეგროვების ორგანიზება მოახდინა.