FTX-ის კრახის შედეგად სუპერმოდელმა 57 მილიონი დაკარგა

FTX-ის კრახის შედეგად სუპერმოდელმა 57 მილიონი დაკარგა

ბრენდ Victoria’s Secret-ის ყოფილი ანგელოზის, ერთ-ერთი ყველაზე მაღალანაზღაურებადი მოდელის, ჟიზელ ბუნდჰენის თქმით, FTX Group-თან კავშირის გამო მან ათობით მილიონი დოლარი დაკარგა.

გასული წლის ნოემბერში კრიპტოვალუტის ბირჟა FTX-ის დაშლამ ბევრი ინვესტორი ხელცარიელი დატოვა.

მათ შორის არიან არა მხოლოდ მსხვილი ინსტიტუციონალური ინვესტორები, არამედ ბევრი ფიზიკური პირიც, ცნობილი სპორტსმენები, ტელეწამყვანები და სხვა ცნობადი სახეები.

Daily Mail-თან ბოლო ინტერვიუში მსოფლიოში ერთ-ერთი ყველაზე მაღალანაზღაურებადი მოდელი ჟიზელ ბუნდჰენი წუხს, რომ FTX-თან და მის აღმასრულებელ დირექტორთან, სემ ბენკმენ-ფრიდთან (Sam Bankman-Fried) თანამშრომლობამ მისი ოჯახის ფინანსურ მდგომარეობაზე დამღუპველი შედეგი იქონია.

რამდენიმე ხნის წინ ჟიზელ ბუნდჰენმა და მისმა ყოფილმა ქმარმა, NFL-ის ვარსკვლავმა ტომ ბრედიმ  FTX Group-ის სარეკლამო აქციებში აქტიური მონაწილეობა მიიღეს. წყვილი კომპანიის რეკლამაში Super Bowl-ზე გადაიღეს და ისინი FTX-ის ელჩები გახდნენ.

ჟიზელმა ჟურნალისტებს განუცხადა, რომ ის და მისი ყოფილი ქმარი სხვა მომხმარებლებისგან არაფრით განსხვავდებიან და FTX-ის გარშემო ატეხილი აჟიოტაჟით მოხიბლულები კომპანიას ბრმად ენდნენ. შედეგად, ვარსკვლავურმა წყვილმა მათ მიერ რეკლამირებულ ბირჟაზე  დიდი ინვესტიცია განახორციელა.

საერთო ჯამში, ბრედი და ბუნდჰენი  FTX Trading-ის დაახლოებით 1,7 მილიონ აქციას ფლობდნენ, რომელთა ღირებულებაც 150 მილიონ დოლარს შეადგენდა.

აქედან პირადად ჟიზელ ბუნდჰენი 600 000-ზე მეტ აქციას ფლობდა. FTX-ის დროებითი ადმინისტრაციის ცნობით, იანვრის მდგომარეობით, ბუნდჰენი და ბრედი FTX-ის აქციების უმსხვილესი ინდივიდუალური მფლობელები იყვნენ.

ახლა ბრედი და ბიუნდჰენი FTX-ის სხვა მომხმარებლებთან  ერთად, რომლებმაც ბირჟის ჩამოშლის შედეგად თანხები დაკარგეს, მოსარჩლე მხარეს წარმოადგენენ.

კრიტიკოსების მტკიცებით, FTX-მა ვარსკვლავური წყვილი პლატფორმაზე მეტი მომხმარებლის მოსაზიდად გამოიყენა.

რამდენიმე დღის წინ, FTX-ის ინვესტორთა ჯგუფმა სასამართლოში მორიგი კოლექტიური სარჩელი შეიტანა.

ამჯერად, YouTube არხის Bitboy Crypto-ს  მფლობელის, ბენ არმსტრონგის წინააღმდეგ (Ben Armstrong), რომელსაც ბრალად აწ უკვე გაკოტრებული ბირჟის პოპულარიზაცია ედება.