აშშ-ს მთავრობა 51000 BTC-ს გაყიდის

აშშ-ს მთავრობა Silk Road-ის  საქმეზე ჩამორთმეულ 51000 BTC-ს გაყიდის

გლობალური საბანკო კრიზისის ფონზე, აშშ-ს მთავრობა სავაჭრო პლატფორმა Silk Road-ის საქმესთან დაკავშირებით ჩამორთმეული 51000-ზე მეტი BTC-ის გაყიდვას აპირებს.

Silk Road-ის საქმესთან დაკავშირებული დოკუმენტაციის მიხედვით, 14 მარტს აშშ-ს მთავრობამ 9861 BTC  215 მილიონ დოლარად გაყიდა.

გაყიდული აქტივები წარსულში  ჯეიმს ჯონგს (James Zhong) ჩამოერთვა, რომელმაც 2012 წელს Silk Road-ის  სისტემა გატეხა და საკუთარ ანგარიშზე 50000-ზე მეტი BTC გადარიცხა.

ჯონგმა თავი Silk Road-ის ძარცვაში დამნაშავედ ცნო და მითვისებული აქტივები აშშ-ს იუსტიციის დეპარტამენტს ნებაყოფლობით გადასცა.

„კალენდარული წლის ბოლომდე მთავრობა ყველა ჩამორთმეული ბიტკოინის ოთხ ეტაპად გაყიდვას აპირებს.“ – ნათქვამია სასამართლოს განცხადებაში.

კრიპტო საზოგადოების ნაწილი, ჩამორთმეული აქტივების გაყიდვას  ინდუსტრიაზე  ხელისუფლების მორიგ თავდასხმად აღიქვამს.

თუმცა, TradingView-ს ინფორმაციით, 9861 BTC-ის პირველ გაყიდვას ბიტკოინის ამჟამინდელ კურსზე არავითარი გავლენა არ მოუხდენია.

პირიქით, მან ზრდა აჩვენა და ახლა კურსი 28444 დოლარს შეადგენს.

ექსპერტების აზრით, საბანკო კრიზისმა  ბიტკოინების მასობრივი გაყიდვის უარყოფითი გავლენა გააბათილა, რადგან გლობალური ინვესტორების მხრიდან თანხების ტრადიციული ფინანსური სისტემებისგან განცალკევებით შენახვის ტენდენცია გამოიკვეთა.

მარტში კომპანია 21Shares-ის ანალიტიკოსებმა განაცხადეს, რომ პრეზიდენტის ოფისისა და აშშ-ს ფედერალური სააგენტოების განკარგულებაში შესაძლოა მინიმუმ 205,000 BTC  იყოს.