მოსამართლემ  ბენკმენ-ფრიდის ადვოკატების შუამდგომლობა უარყო

მოსამართლემ  ბენკმენ-ფრიდის ადვოკატების შუამდგომლობა უარყო

ფედერალურმა სასამართლომ, რომელიც გაკოტრებული კრიპტო ბირჟა FTX-ის ყოფილი ხელმძღვანელის საქმეს განიხილავს, სემ ბენკმენ-ფრიდის წინააღმდეგ არსებული ბრალდებების უმეტესი ნაწილის გაუქმების შესახებ დაცვის მხარის შუამდგომლობა უარყო.

გასულ თვეში სემ ბენკმენ-ფრიდის (Sam Bankman-Fried) ადვოკატებმა ნიუ-იორკის სამხრეთ ოლქის რაიონული სასამართლოს მოსამართლეს ლუის კაპლანს (Lewis Kaplan) FTX-ის ყოფილი ხელმძღვანელის წინააღმდეგ წარდგენილი ბრალდებების დიდი ნაწილის გაუქმება სთხოვეს.

დამცველების მტკიცებით, ზოგიერთი ბრალდება მეორდება.

ადვოკატებმა ასევე სთხოვეს კაპლანს, ბენკმენ-ფრიდისთვის მოეხსნა თაღლითობის ბრალდება,

რომელიც Alameda Research-ის მეშვეობით საკუთარი ინვესტიციების მხარდასაჭერად FTX კლიენტების აქტივების სავარაუდო გამოყენებასთან არის დაკავშირებული.

მათი განცხადებით, კლიენტებმა სავარაუდო თაღლითობით გამოწვეული „ეკონომიკური ზარალი“ვერ ნახეს,

ხოლო თავად ბენკმენ-ფრიდი  კლიენტების ანგარიშებზე ვალების დაბრუნებას აპირებდა.

თუმცა, კაპლანმა შუამდგომლობა უარყო და მას „საკამათო ან დაუსაბუთებელი“ უწოდა.

 „ბრალდებული დამნაშავეა როგორც ფაქტების, ასევე კანონის თვალსაზრისით“- წერს კაპლანი.

თუ ბენკმენ-ფრიდი ბრალდების ყველა პუნქტში დამნაშავედ ცნეს და მაქსიმალური სასჯელი მიუსაჯეს, მას თავისუფლების აღკვეთა 100 წელზე მეტი ვადით ემუქრება.

ამჟამად ის შინაპატიმრობაში მშობლების სახლში იმყოფება.

ბენკმენ ფრიდის საქმეზე სასამართლო სხდომა ოქტომბერშია ჩანიშნული, თუმცა მისი ადვოკატები სხდომის გადადებას მოითხოვენ.

ამ კვირაში გაირკვა, რომ FTX-ის ახალმა მენეჯმენტმა სარჩელი შეიტანა K5 Global-ის, Mount Olympus Capital-ის, SGN Albany Capital-ის და მათი შვილობილი კომპანიების წინააღმდეგ, რომლებიც 700 მილიონი დოლარის ინვესტიციის დაბრუნებას ითხოვდნენ.

სარჩელის თანახმად, ბენკმენ ფრიდი ამ კომპანიების მიერ ორგანიზებულ ერთ-ერთ ხალხმრავალ ღონისძიებას დაესწრო, რის შემდეგაც, 700 მილიონი დოლარის ინვესტიცია ჩადო იმ ფონდებში, რომლებსაც ზემოთხსენებული კომპანიები მართავენ.