კრიპტოვალუტაში გადახდები მყისიერი და უფასო უნდა იყოს

კრიპტოვალუტაში გადახდები მყისიერი და უფასო უნდა იყოს

ამერიკული კრიპტო ბირჟა Coinbase-ის აღმასრულებელმა დირექტორმა კრიპტო საზოგადოებასთან უახლოეს მომავალში მთელი მსოფლიოს მასშტაბით კრიპტო აქტივებით მყისიერი და უფასო გადახდების განხორციელების გზები განიხილა.

ბრაიან არმსტრონგმა (Brian Armstrong) საკუთარ ტვიტერზე დაწერა, რომ მისი აზრით, კრიპტოვალუტის ინდუსტრიის განვითარების შემდეგი ნაბიჯი მთელს მსოფლიოში მყისიერი და უფასო გადახდები იქნება. თუმცა, ეს ბაზრის მონაწილეებისგან, მათ შორის Coinbase-ისგან დიდ ძალისხმევას მოითხოვს.  საჭირო იქნება ბლოკჩეინების მასშტაბირებისთვის მეორე დონის გადაწყვეტილებების ინტეგრირება და კრიპტოვალუტის პლატფორმებზე მომხმარებლებისთვის რეგისტრაციის გამარტივება.

კრიპტოვალუტით გადახდა მომხმარებლებს არაუმეტეს ერთი ცენტისა უნდა უჯდებოდეთ, ანგარიშსწორება კი დაახლოებით ერთ წამში უნდა ხდებოდეს. თუ ეს მოხერხდება, არმსტრონგის რწმენით, კრიპტოვალუტით გადახდის მოცულობა გაიზრდება.

„დღეს კრიპტოვალუტებს საერთაშორისო გადახდის ინფრასტრუქტურის გაუმჯობესების დიდი პოტენციალი აქვთ. მაგრამ ეს პოტენციალი ბოლომდე არ არის რეალიზებული, რადგან ჯერ კიდევ პირველი დონის გადაწყვეტილებებზე ვართ ჩარჩენილი. გადახდები წყალივითაა, ისინი მინიმალური წინააღმდეგობის მიმართულებით მიედინება. “- განმარტავს Coinbase-ის აღმასრულებელი დირექტორი.

არმსტრონგის ტვიტს MicroStrategy-ის აღმასრულებელი თავმჯდომარე მაიკლ სეილორი (Michael Saylor) გამოეხმაურა. ის დარწმუნებულია, რომ ამოცანასთან გამკლავებას Lightning Network შეძლებს. ბიტკოინის ტრანზაქციების სიჩქარის გასაზრდელად და საკომისიოების შესამცირებლად Lightning Network-ის ინტეგარცია ცოტა ხნის წინ უმსხვილესმა კრიპტო ბირჟა Binance-მა მოახდინა. სეილორის აზრით, Coinbase-მაც იგივე უნდა გააკეთოს. მას Twitter-ის დამფუძნებელი ჯეკ დორსიც (Jack Dorsey) დაეთანხმა, რომელიც ასევე ითვლება ბიტკოინის აქტიურ მხარდამჭერად.

დისკუსიას Solana-ს თანადამფუძნებელი ანატოლი იაკოვენკო შეუერთდა. მისი მტკიცებით, Solana -ს ბლოკჩეინზე სტეიბლკოინ USDC-ით განხორციელებული გადახდები ბევრად უფრო სწრაფი და იაფია ბიტკოინთან და Lightning Network-თან შედარებით. იაკოვენკოს თქმით, მომხმარებლებისთვის საერთაშორისო გადახდებისთვის USDC-ის გამოყენება უფრო მოსახერხებელი იქნებოდა, რადგან ამ სტეიბლკოინის ტრანზაქციის დადასტურების დრო საშუალოდ მხოლოდ 1,3 წამია.