Alameda Research-ის ქეროლაინ ელისონი სემ ბენკმენ-ფრიდის წინააღმდეგ

Alameda Research-ის ქეროლაინ ელისონი სემ ბენკმენ-ფრიდის წინააღმდეგ

Alameda Research-ის ყოფილი აღმასრულებელი დირექტორი, გაკოტრებული კრიპტო ბირჟა FTX-ის ჰეჯ-ფონდის პარტნიორი, 10 ოქტომბერს დაგეგმილ სასამართლო სხდომაზე გამამტყუნებელი ჩვენების მიცემას აპირებს.

სამართალწარმოებასთან დაახლოებულ წყაროებზე დაყრდნობით ცნობილი გახდა, რომ პროკურატურა Alameda Research-ის ჰეჯ-ფონდის ყოფილი დირექტორისგან, ქეროლაინ ელისონისგან (Caroline Ellison) ისეთ ჩვენებას ელოდება, რომელიც სემ ბენკმენ-ფრიდის (Sam Bankman-Fred) კლიენტების აქტივების ქურდობასა და FTX Group-ის ეკოსისტემის ჩამოშლაში ბრალეულობას დაამტკიცებს.

პროკურატურა დარწმუნებულია, რომ Alameda Research-მა ბირჟა FTX-ის დაშლაში გადამწყვეტი როლი ითამაშა. ელისონსა და ბენკმენ-ფრიდს შორის არსებული განსაკუთრებული პირადი ურთიერთობის წყალობით, ჰეჯ-ფონდს შესაძლებლობა მიეცა FTX-სგან განუსაზღვრელი ოდენობის თანხები აეღო და ბირჟის გარეშე აქტივობებისთვის, მათ შორის პოლიტიკური შემოწირულობებისთვის გამოეყენებინა.

პროკურორების განცხადებით, 2022 წლის შემოდგომისთვის Alameda-ს FTX-ის მიმართ არსებული დავალიანება თითქმის 14 მილიარდ დოლარს შეადგენდა. მიუხედავად იმისა, რომ ბენკმენ-ფრიდი მისი ბირჟის უსაფრთხოებაზე მსოფლიოს ატყუებდა, ელისონმა და მისმა ახლო წრემ კლიენტების თანხების გაფლანგვის შესახებ სიმართლე იცოდნენ.

მანამდე, ჩრდილოეთ კალიფორნიის საოლქო სასამართლოში Binance-ისა და მისი აღმასრულებელი დირექტორის წინააღმდეგ ჯგუფური სარჩელი ადგილობრივმა მაცხოვრებელმა ნირ ლაჰავმა (Nir Lahav) შეიტანა.