სახელმწიფო სტეიბლკოინი კრიპტოვალუტების უმეტესობას მოსპობს

სახელმწიფო სტეიბლკოინი კრიპტოვალუტების უმეტესობას მოსპობს

ბრაზილიის ფასიანი ქაღალდებისა და ბირჟების კომისიის (CVM) განცხადებით, ქვეყნის ცენტრალური ბანკის ციფრული ვალუტა (DREX) ადგილობრივი ბაზრიდან ბიტკოინის გარდა ყველა ციფრული ვალუტის გაქრობას შეუწყობს ხელს.

კომისიის ხელმძღვანელი ჟოაო პედრო ნაშიმენტო (João Pedro Nascimento) დარწმუნებულია, რომ სახელმწიფო სტეიბლკოინის შემოღება ნაკლებად ცნობილ კრიპტოვალუტებზე უარყოფითად იმოქმედებს. კომისიაში ფიქრობენ, რომ DREX-მა მოქალაქეების ფინანსურ სერვისებზე წვდომა უნდა გააფაერთოვოს, გადმოიღოს სხვა კრიპტოვალუტების უპირატესობები და სასარგებლო ფუნქციები და ამ გზით მომხმარებელთა ყურადღება სხვა კრიპტო პროექტებიდან სახელმწიფო კრიპტო ვალუტაზე გადმოიტანოს.  ნაშიმენტოს თქმით,  ცენტრალური ბანკის ციფრული ვალუტა ჭკვიან კონტრაქტებს გამოიყენებს, რაც  ტრანზაქციების სიჩქარესა და ეფექტურობას გაზრდის. ის დარწმუნებულია, რომ DREX-ის უსაფრთხოების წყალობით, კრიპტოვალუტები ბრაზილიელებისთვის მიმზიდველი აღარ იქნება.

„მე არ ვსაუბრობ ბიტკოინზე, რომელიც საბაზრო კაპიტალიზაციის მიხედვით წამყვანი კრიპტოაქტივია. როგორც გამონაკლისი, ის კვლავაც პოპულარობით სარგებლობს ბრაზილიელებში“ – განაცხადა CVM-ის პრეზიდენტმა.

იმ დროს, როცა მარეგულირებლების უმეტესობას კრიპტოვალუტების მიმართ მკაცრი დამოკიდებულება აქვთ, CVM უფრო მოქნილ მიდგომას ამჯობინებს. ნაშიმენტომ ხაზგასმით აღნიშნა, რომ ტექნოლოგიური ინოვაციები უდაოდ უნდა დარეგულირდეს, მაგრამ ეს ისე უნდა გაკეთდეს, რომ მათი არა ჩახშობა, არამედ განვითარება მოხდეს. კრიპტოვალუტების რეგულირების ნაკლებობა ჩრდილოვან ბაზარს ქმნის, რომელშიც მონაწილეებს თავისუფლად შეუძლიათ გაათეთრონ ფული და აირიდონ გადასახადები.

„ ყოველ ჯერზე, როდესაც ადამიანები ინოვაციების შეფერხებას ცდილობენ, ისინი მარცხს განიცდიან. ჩვენ ინოვაციებში ახალი შესაძლებლობები უნდა დავინახოთ და მათ ბაზარზე გატანას უნდა შევეცადოთ “ – თქვა ნაშიმენტომ