ბუტანი შესაძლოა ბიტკოინის რეზერვების გარეშე დარჩეს

ბუტანი შესაძლოა  ბიტკოინის რეზერვების გარეშე დარჩეს

კომპანია Arkham Intelligence-ის ანალიტიკოსების ინფორმაციით,  გასული წლის შუა პერიოდიდან მოყოლებული ბუტანის სამეფოსთან დაკავშირებული კრიპტო საფულეებიდან ბირჟებსა და სავაჭრო პლატფორმებზე 1 მილიარდ დოლარზე მეტი ღირებულების ბიტკოინი გავიდა.

ექსპერტების გამოთვლებით, სახელმწიფოს მარაგში არსებული კრიპტოაქტივების მოცულობა დაახლოებით 13 000 BTC-დან 3100 BTC-მდე შემცირდა. მხოლოდ მიმდინარე წლის დასაწყისიდან, ბუტანის სუვერენული ფონდის, Druk Holding and Investments (DHI)-ის საფულეებიდან, დაახლოებით 207 მილიონი დოლარის ღირებულების ბიტკოინი იქნა გატანილი.

Arkham-ის შეფასებით, თუ სამეფოს ბიტკოინ-მარაგების შემცირების ტემპი შენარჩუნდა, ბუტანმა შესაძლოა სარეზერვო ფონდიდან ყველა დარჩენილი ბიტკოინი უკვე ოქტომბრისთვის ამოწუროს. ამასთან, კრიპტოვალუტის გატანის მიზანი დღემდე უცნობია.

„როდესაც ორგანიზაცია აქტივებს ბირჟაზე ან გარე სავაჭრო პარტნიორთან აგზავნის, გადარიცხვის მიზანი, როგორც წესი, ამ აქტივების გადაცვლაა. თუმცა, ცენტრალიზებულ ბირჟაზე თანხების მოხვედრის შემდეგ, არ არსებობს ცალსახა ნიშნები იმისა, რომ ისინი გაიყიდა: ბირჟის ორდერების წიგნები ბლოკჩეინის მიღმაა. მიუხედავად ამისა, აქტივების ბირჟებზე განთავსება, როგორც წესი,  აქტიურ გაყიდვაზე მიუთითებს.“ – განმარტეს Arkham-ში.

ზოგიერთი მიმღები საფულე მანამდე შემხებლობაში იყო კრიპტო ბირჟებთან Galaxy Digital და OKX. ერთ-ერთ სავაჭრო პლატფორმასთან დაკავშირებული წყაროს ცნობით,  რომელმაც ბუტანის საფულეებიდან ბიტკოინები მიიღო,  ბოლო პერიოდში გაყიდვები არ განხორციელებულა.

DHI-ის გენერალურმა დირექტორმა, უჯვალ დიპ დაჰალმა (Ujjwal Deep Dahal) CoinDesk-თან საუბარში განაცხადა, რომ არ ახსოვს, ბოლოს როდის გაყიდა ფონდმა ბიტკოინი. DHI-ს საფულეებზე თანხების მოძრაობაზე კომენტარი არ გაუკეთებია, არც საფულეების კუთვნილების შესახებ Arkham-ის დასკვნა გაუსაჩივრებია  და არც ბუტანის მფლობელობაში არსებული ბიტკოინების ამჟამინდელი მოცულობა დაუდასტურებია.

ანალიტიკოსები აღნიშნავენ, რომ თანხების გადაადგილებას შესაძლოა სხვა ახსნაც ჰქონდეს. მაგალითად, ეს შეიძლება იყოს გადარიცხვები შენახვის სერვისის პროვაიდერებთან, ბიტკოინების გირაოდ გამოყენება, საკრედიტო ხელშეკრულებები ან გარე (OTC) გარიგებები, რომლებიც არ არის გაფორმებული როგორც პირდაპირი გაყიდვა.

DHI-ში ირწმუნებიან, რომ ბუტანის ხელისუფლება ბიტკოინის მაინინგს კვლავ აგრძელებს. დაჰალის თქმით, წელს „ქვეყანას გაუმართლა“, რადგან წვიმები ადრე და რეგულარულად მოვიდა.

„ნალექები ჩვენს ჰიდროელექტროსადგურებს მაღალი სიმძლავრით მუშაობაში ეხმარება, ხოლო მაინინგის ოპერაციები აქტიური რჩება. ბუტანში მოპოვებული ყველა ბიტკოინი მწვანე ენერგიის გამოყენებით იწარმოება და ჩვენ მუდმივად ვანახლებთ აღჭურვილობას უახლესი მოდელებით, რათა კონკურენტუნარიანობა შევინარჩუნოთ.“ –  განაცხადა სახელმწიფო კომპანიის გენერალურმა დირექტორმა.

მარტში გავრცელდა ინფორმაცია, რომ ბუტანმა მაინინგი სრულად შეაჩერა. ამაზე ირიბად მიუთითებდა ის ფაქტიც, რომ 2025 წლის განმავლობაში ქვეყნის საფულეებზე ბიტკოინების მნიშვნელოვანი შემოსავალი არ დაფიქსირებულა. სამეფო ბიტკოინების რეზერვს არა ბირჟაზე მონეტების შეძენით, არამედ კრიპტო-მოპოვების ხარჯზე ავსებდა.