by Giorgi 
ევროკავშირმა 17 კრიპტო კომპანიის წინააღმდეგ სანქციები დააწესა
ევროკავშირმა რუსული ეკონომიკის წინააღმდეგ სანქციების 21-ე პაკეტი მიიღო და 17 კრიპტოვალუტის კომპანიის საქმიანობაზე შეზღუდვები დააწესა. ევროკავშირის შეფასებით, სანქცირებული კომპანიების მიერ შეთავაზებული სერვისები რუსეთს ადრე დაწესებული სანქციებისთვის გვერდის ავლაში ეხმარება.
ევროკავშირის შავ სიაში მოხვდა ჩინეთში შექმნილი და სეიშელის კუნძულებზე დარეგისტრირებული კრიპტობირჟა HTX, ასევე დიდ ბრიტანეთში დარეგისტრირებული ბირჟა EXMO. გარდა ამისა, ჩამონათვალს დაემატა რუბლის გადამცვლელი სერვისები Rapira, ABCeX და BitPapa, გადამცვლელების აგრეგატორი Exnode, ბელარუსული სერვისი WhiteBird, ასევე რუბლის სტეიბლკოინ A7A5-ის ემიტენტი კომპანია A7-ის აფრიკული წარმომადგენლობები A7 Nigeria და A7 Africa. სანქციების სიაში ყირგიზეთში დარეგისტრირებული A7 ჯგუფის სულ ოთხი კომპანიაა შეყვანილი. პერსონალური სანქციების ქვეშ მოხვდა ასევე პროექტ A7 -ის ხელმძღვანელი ლეონიდ შუმაკოვიც.
შეზღუდვების ქვეშ ასევე აღმოჩნდნენ:
Aifory Pro
NoOneCrypto
Tradex
Monease
PilotFinance
კრიპტო პლატფორმების მიმართ სანქციები ძალაში 23 აგვისტოს შევა. გარდა ამისა, ევროკავშირის ახალი ზომები ბელარუსის მოქალაქეებზეც ვრცელდება. ბელორუსის მოქალაქეებს ევროზონის იმ კომპანიების ფლობა, კონტროლი ან მართვა ეკრძალებათ, რომელთა საქმიანობაც ევროპული კრიპტოლიცენზიით (MiCA) რეგულირდება.
მანამდე, რამდენიმე კრიპტოპლატფორმის (მათ შორის HTX-ის) წინააღმდეგ სანქციები დიდმა ბრიტანეთმა დააწესა. თუმცა, როგორც ამერიკული ბლოკჩეინ-კომპანია TRM Labs-ის ანალიტიკოსებმა დაადგინეს, HTX-მა რუსი მომხმარებლების მომსახურება განაგრძო და სანქციებისთვის გვერდის ავლის მიზნით თავისი ინფრასტრუქტურა გარდაქმნა. ბირჟა Tron, Ethereum, BNB Smart Chain და Solana ქსელებში რეგულარულად ცვლის „ცხელ საფულეებსა“ და დეპოზიტის მისამართებს, რაც წინასწარ ცნობილ მისამართებზე ოპერაციების თვალყურის დევნებას ართულებს.
წყარო: https://eur-lex.europa.eu/legal-content/EN/TXT/?uri=OJ:L_202601848
სიახლეების გამოწერა
