by Giorgi 
ევროპის ცენტრალურმა ბანკმა ციფრული ევროს ტესტირებისთვის მონაწილეები შეარჩია
ევროპის ცენტრალურმა ბანკმა (ECB) ციფრული ევროს ტესტირებაში მონაწილეობის მისაღებად 36 ბანკი და გადახდის სერვისი შეარჩია. საპილოტე პროექტი 2027 წლის მეორე ნახევარში დაიწყება და 12 თვე გაგრძელდება.
ციფრული ევროს ტესტირებაში მონაწილეობის მსურველ 50-ზე მეტ აპლიკანტს შორის შეირჩნენ: გერმანული Deutsche Bank, იტალიური UniCredit, ფრანგული BPCE, ლიეტუვაში რეგისტრირებული Revolut Bank, ირლანდიური Stripe Technology და ჰოლანდიური Adyen.
ევროპის ცენტრალური ბანკი ციფრული ევროს ბეტა ტესტებში სულ 19 ევროპულ ცენტრალურ ბანკს ჩართავს. მოცემულ ბეტა ვერსიას კანონიერი გადახდის საშუალების სტატუსი არ ექნება. ტესტირება ცენტრალური ბანკის ციფრული ვალუტის (CBDC) გამოყენების ძირითად სცენარებს მოიცავს: ფიზიკურ პირებს შორის ონლაინ და ოფლაინ გადარიცხვებს, ასევე ფიზიკურ და ონლაინ მაღაზიებში შესყიდვებს.
საპილოტე პროექტის მონაწილეებს როლების არჩევა შესთავაზეს. გადახდის პროვაიდერები სხვა მონაწილეების ციფრული ევროს სატესტო ანგარიშებსა და გადახდის სერვისებზე წვდომას უზრუნვეყოფენ, ხოლო შესყიდვის სერვისის პროვაიდერები შერჩეულ გამყიდველებს გადახდების CBDC-ში მიღების შესაძლებლობას მისცემენ. მომხმარებლები ევროპის ცენტრალური ბანკის და სხვა ცენტრალური ბანკების თანამშრომლები იქნებიან, ხოლო გამყიდველები – რეალური რესტორნები, კაფეები და მაღაზიები. მონაწილეთა მხრიდან ციფრული ევროს გამოყენების მზაობისა და სისტემის სიცოცხლისუნარიანობის შესაფასებლად, ზოგიერთი კომპანია ორივე როლს მოირგებს.
ევროპის ცენტრალური ბანკის აღმასრულებელი საბჭოს წევრის პიერო ჩიპოლოს (Piero Cipollone) განცხადებით, აშშ დოლარზე მიბმული სტაბილური კრიპტოვალუტების განვითარების ფონზე, ციფრული ევრო ევროპული გადახდის ინფრასტრუქტურის გაძლიერებისა და ევროპული ფინანსური სისტემის რისკების შესამცირებლად არის საჭირო.
ადრე ჩიპოლონეს კოლეგამ, იზაბელ შნაბელმა (Isabel Schnabel) განაცხადა, რომ ციფრული ევრო ევროს უცხოური გადახდის სისტემებზე დამოკიდებულების შემცირების შესაძლებლობას მისცემს. შნაბელი შიშობს, რომ USDT და USDC სტეიბლკოინების ფართოდ გამოყენებამ, შესაძლოა ევროპის ფინანსურ სისტემებში დოლარის დომინირება გაამყაროს.
