by Giorgi 
იტალიურ კრიპტო კომპანიებს ლიცენზიის მისაღებად დრო შეეზღუდათ
იტალიის კომპანიებისა და ბირჟების კომისიამ (CONSOB) კრიპტოვალუტებთან დაკავშირებული მომსახურების მიმწოდებლებს (VASP) მოუწოდა ევროკავშირის MiCA-ს (კრიპტოვალუტის რეგულირების აქტი) სტანდარტების შესაბამისი ლიცენზია რაც შეიძლება მალე მიიღონ.
მარეგულირებლის განცხადებით, ციფრული აქტივების კომპანიებს ოპერირება მხოლოდ 30 დეკემბრამდე შეეძლებათ. საქმიანობის გაგრძელების სურვილის შემთხვევაში, მათ CONSOB-ისგან კრიპტოვალუტის მომსახურების მიმწოდებლებად მუშაობისთვის ავტორიზაცია უნდა მოიპოვონ. VASP-ებს, რომლებიც რეგისტრაციაზე განაცხადს 30 დეკემბრამდე იტალიაში ან ევროკავშირის სხვა წევრ სახელმწიფოში შეიტანენ, მომხმარებელთა მომსახურების უფლება განაცხადის განხილვის პერიოდშიც ექნებათ. განხილვის პერიოდი განაცხადის დამტკიცების ან უარყოფისთანავე დასრულდება არაუგვიანეს 2026 წლის 30 ივნისისა.
ამჟამად, იტალიური კრიპტო კომპანიები საქმიანობას აგენტებისა და ბროკერების ეროვნულ რეესტრში (OAM) რეგისტრაციის მეშვეობით აწარმოებენ.
CONSOB მომხმარებლებს მომსახურების მიმწოდებლების რეგულაციებთან შესაბამისობის დამოუკიდებლად შემოწმებას ურჩევს. ასევე ურჩევს მოითხოვონ განმარტებები, თუ ამის შესახებ ინფორმაცია ხელმისაწვდომი არ არის. ახალი წლიდან რეგისტრირებული კომპანიების მოძებნა OAM-ში ან ევროპის ფასიანი ქაღალდებისა და ბაზრების ორგანოში (ESMA) იქნება შესაძლებელი. იტალიელი ოფიციალური პირების თქმით, ავტორიზაციის გარეშე მოქმედ სერვისებს მომსახურების შეთავაზება აეკრძალებათ, ამიტომ მომხმარებლებს უფლება აქვთ თანხის დაბრუნება მოითხოვონ.
VASP-ები, რომლებიც მარეგულირებლის ავტორიზაციას არ მიიღებენ, ვალდებულნი არიან 30 დეკემბრამდე იტალიის ტერიტორიაზე ოპერირება და მომხმარებლებთან არსებული კონტრაქტები შეწყვიტონ. ასევე ვალდებულნი არიან მომხმარებლებს კრიპტოაქტივები დაუბრუნონ და ფონდების მართვისა და შენახვის სერვისების მიწოდება შეაჩერონ. CONSOB-ის განცხადებით, OAM-ის რეესტრში დარჩენილ VASP-ებს კუთვნილ ვებსაიტებზე მათი საქმიანობის შესახებ დეტალური ინფორმაციის განთავსება მოეთხოვებათ. ასევე მოეთხოვებათ უშუალოდ აცნობონ მომხმარებლებს მათი ქმედებების შესახებ, იქნება ეს MiCAR ლიცენზიის მიღება თუ ბაზრიდან გასვლის დაგეგმვა.
აპრილში ხელისუფლებამ იტალიელებს ხუთ კრიპტო პლატფორმაზე წვდომა დაუბლოკა. პლატფორმებს ბრალი ციფრული აქტივებით და კრიპტო წარმოებულებით უკანონო ვაჭრობაში წარედგინათ.
სიახლეების გამოწერა
