კრიპტობირჟამ Coinbase თანამშრომლების 14% დაითხოვა

კრიპტობირჟამ Coinbase თანამშრომლების 14% დაითხოვა

უდიდესმა ამერიკულმა კრიპტობირჟამ Coinbase პერსონალი 14%-ით შეამცირა, რაც დაახლოებით 700 ადამიანს შეადგენს. ბირჟამ თანამშრომლების გათავისუფლება ხარჯების შემცირების მიზნით ბიზნესის რესტრუქტურიზაციითა და „ხელოვნურ ინტელექტზე ორიენტაციით“ ახსნა.

Coinbase-ის გენერალურმა დირექტორმა, ბრაიან არმსტრონგმა (Brian Armstrong) სოციალურ ქსელ X-ში დაწერა, რომ ბირჟის ბიზნესი „კვარტლიდან კვარტლამდე არასტაბილურია“. გასული წლის ოქტომბერი-დეკემბრის პერიოდში Nasdaq-ის საფონდო ბირჟაზე წარმოდგენილმა კრიპტობიტჟამ  667 მილიონი დოლარის წმინდა ზარალი დააფიქსირა, მაშინ როცა წინა კვარტალი (ივლისი-სექტემბერი) კომპანიისთვის მომგებიანი იყო. მთლიანი გასული წლის განმავლობაში Coinbase-ის წმინდა მოგებამ 1,26 მილიარდი დოლარი შეადგინა, რაც 2024 წელთან შედარებით 51%-ით ნაკლებია.

არმსტრონგმა ხარჯების ოპტიმიზაციის სურვილი კრიპტობაზარზე გაჭიანურებული „დათვის ტრენდიდან“ გამოსვლის პერიოდში პლატფორმის ეფექტურად მუშაობის გაგრძელების უნარის შენარჩუნებით ახსნა.  ტოპ-მენეჯერი ირწმუნება, რომ Coinbase ფლობს საკმარის კაპიტალს, აქვს შემოსავლის სხვადასხვა წყარო და  ნებისმიერი რყევისთვის კარგად არის მომზადებული. ამასთანავე, მან კმაყოფილება გამოთქვა იმასთან დაკავშირებით, რომ  სტეიბლკოინები, პროგნოზირების ბაზრები და აქტივების ტოკენიზაცია სულ უფრო პოპულარული ხდება.

მისი თქმით, ხელოვნურმა ინტელექტმა ბირჟის გუნდის მუშაობა რიგი პროცესების ავტომატიზაციის გზით შეცვალა. ხარჯების შემცირებისა და მუშაობის დაჩქარების მიზნით, კომპანია თავისი ორგანიზაციული სტრუქტურის გამარტივებასა და გენერალური დირექტორის ქვემოთ მაქსიმუმ ხუთი დონის დატოვებას აპირებს.

Coinbase არ არის ერთადერთი, ვინც მსგავსი გადაწყვეტილება მიიღო: მარტში სინგაპურულმა კრიპტობირჟამ Crypto.com პერსონალის 12% -ის დათხოვნა სამუშაო პროცესების AI-ს მეშვეობით ავტომატიზაციით ახსნა. თებერვალში კი თანამშრომლების ნაწილის ხელოვნური ინტელექტით ჩანაცვლების მიზეზით 200 სამუშაო ადგილის შემცირების შესახებ კომპანიამ Gemini Space Station (GEMI) გამოაცხადა.