კრიპტოვალუტით გათეთრებული ფულის მოცულობამ რეკორდულ მაჩვენებელს მიაღწია

კრიპტოვალუტით გათეთრებული ფულის მოცულობამ რეკორდულ მაჩვენებელს მიაღწია

Chainalysis-ის ანალიტიკოსების მონაცემებით, კრიპტოვალუტის გამოყენებით გათეთრებული ფულის მოცულობამ გასულ წელს 82 მილიარდ დოლარს მიაღწია. შედარებისთვის, 2020 წელს ეს მაჩვენებელი 10 მილიარდ დოლარს შეადგენდა.

კრიმინალები ფულის გათეთრებისთვის ცენტრალიზებულ კრიპტო ბირჟებს სულ უფრო იშვიათად იყენებენ. ექსპერტების განმარტებით, მთავრობის ზეწოლის გამო, ამ პლატფორმებმა მნიშვნელოვნად გააძლიერეს მომხმარებელთა შემოწმება და უსაფრთხოების ზომები და საეჭვო აქტივებს უფრო ხშირად ყინავენ.

მოწინავე პოზიცია ფულის გათეთრების ჩინურმა ქსელებმა დაიკავეს. 82 მილიარდი დოლარიდან 16 მილიარდი ჩინურენოვან პლატფორმებზე მოდის. ანალიტიკოსების აზრით, ამ ზრდის მთავარი მამოძრავებელი ძალა კრიპტოვალუტების ხელმისაწვდომობისა და გავრცელების ზრდაა.

Chainalysis-ის ექსპერტების ცნობით, ჩინურენოვან არხებს Telegram-სა და სხვა პლატფორმებზე არალეგალური სერვისების ფართო სპექტრი აქვთ წარმოდგენილი: იყენებენ დროპერებს, აწყობენ არაოფიციალურ სავაჭრო პლატფორმებს. ასევე, აზარტული თამაშების პლატფორმების გამოყენებით კრიპტოვალუტების შერევასა და გაცვლას ახორციელებენ.

ასეთი სქემები ჯერ კიდევ კორონავირუსის პანდემიის შემდეგ ფუნქციონირებს და ბოლო ხუთი წლის განმავლობაში მათი მეშვეობით უკანონო კრიპტოვალუტების დაახლოებით 20%-ის გადაადგილება განხორციელდა. ანალიტიკოსების ცნობით, 2020 წლიდან იდენტიფიცირებულ ჩინურენოვან ქსელებში თანხების შემოდინება 7,325-ჯერ უფრო სწრაფად გაიზარდა, ვიდრე ცენტრალიზებულ ბირჟებზე.

ცოტა ხნით ადრე, ბლოკჩეინ კომპანია Card1Ventures-ის დამფუძნებელმა და Node40-ის თანაინვესტორმა, გარი კარდონემ (Gary Cardone) განაცხადა, რომ მომავალში ბლოკჩეინის თვალის მიდევნების სისტემების შემუშავებასთან ერთად, ე.წ „ჭუჭყიანი ბიტკოინები“, რომლებიც ოდესღაც უკანონო საქმიანობისთვის გამოიყენებოდა, გლობალური ფინანსური სისტემიდან გარიცხვის რისკის ქვეშ იქნებიან. „სუფთა“ მონეტები კი უფრო ღირებული გახდება.

წყარო: https://www.chainalysis.com/blog/2026-crypto-money-laundering/