მემკოინ HANTA-ს ფასი 700%-ით გაიზარდა

მემკოინ HANTA-ს ფასი  საკრუიზო ლაინერზე ვირუსის გავრცელების ფონზე 700%-ით გაიზარდა

ხუთშაბათს, 7 მაისს, პლატფორმა Pump.fun-ზე გაშვებული მემკოინის, HANTA-ს ფასი ერთ დღეში თითქმის 700%-ით გაიზარდა და 0,0064$ შეადგინა. კრიპტოვალუტა მას შემდეგ გამოჩნდა, რაც ნიდერლანდურ საკრუიზო ლაინერ MV Hondius-ის ბორტზე სასიკვდილო ვირუსის აფეთქების შესახებ ინფორმაცია გავრცელდა.

ტოკენი Solana-ს ბლოკჩეინზე სამი დღის წინ გაეშვა. ხუთშაბათ საღამოსთვის HANTA-ს კაპიტალიზაციამ 6 მილიონ დოლარს მიაღწია, რაც ნახევარ დღეში თითქმის გაორმაგებული მაჩვენებელია. ვაჭრობის მოცულობამ კი 10 მილიონ დოლარს გადააჭარბა. სერვის Dexscreener-ის მონაცემებით, ინვესტორების ტოპ-სიაში  „ჰანტავირუსის“ თემატიკის ერთბაშად რამდენიმე მემკოინი მოხვდა. მათი უმეტესობა 150–200%-ით გაიზარდა, თუმცა ამ აქტივების ლიკვიდურობა დაბალია, ხოლო მათი საბაზრო კაპიტალიზაცია 50 000$-ს ვერ ასცდა.

ჰანტავირუსის გამო ლაინერზე სამი მგზავრი გარდაიცვალა, მინიმუმ შვიდი კი დაავადდა. ეს ვირუსი მღრღნელებში 50 წლის წინ აღმოაჩინეს და სახელი სამხრეთ კორეაში მდებარე მდინარის პატივსაცემად უწოდეს. გემი არგენტინის ქალაქ უშუაიადან 1 აპრილს, პოლარული კრუიზის ფარგლებში გავიდა. ამჟამად ის კაბო-ვერდეს სანაპიროსთან არის ღუზაჩაშვებული: დაავადებულთა ევაკუაცია ევროპის საავადმყოფოებში მიმდინარეობს. ჯანდაცვის მსოფლიო ორგანიზაციამ და მედიკოსებმა დაადასტურეს „ანდების“ შტამით ინფიცირების შემთხვევები, რომელიც იშვიათად, თუმცა შესაძლოა ადამიანიდან ადამიანზეც გადავიდეს.

მკვეთრი აღმასვლა  „ვირუსულ“ მემკოინებს ხშირად ახასიათებთ – მაგალითად, Solana-ს ბლოკჩეინზე შექმნილ მონეტას MOODENG, რომელიც გადაშენების პირას მყოფ ჯუჯა ბეჰემოთ მუ დენს (Moo Deng) ეძღვნება, ტაილანდის ზოოპარკ Khao Kheow-დან გავრცელებული სიახლეების ფონზე ის მკვეთრად არაერთხელ გაიზარდა და დაეცა.

 აპრილში 1400%-ით გაიზარდა მემკოინ JONATHAN-ის ფასი, მას შემდეგ, რაც მონეტის სიმბოლოს – 193 წლის კუს, სახელად ჯონათანის გარდაცვალების შესახებ ინფორმაცია გავრცელდა. მოგვიანებით გაირკვა, რომ ეს ინფორმაცია საპირველაპრილო ხუმრობა იყო.

იანვარში კიდევ ერთი „ზოო-კრიპტომონეტა“ The Nietzschean Penguin 564%-ით გაიზარდა. ეს მას შემდეგ მოხდა, რაც თეთრი სახლის ოფიციალურმა გვერდმა გამოაქვეყნა პოსტი დონალდ ტრამპის ფოტოთი და წარწერით: „Embrace the Penguin“ (ჩაეხუტე პინგვინს).