by Giorgi 
რესპუბლიკელმა სენატორმა კანონპროექტ CLARITY-ს განხილვის გადადება მოითხოვა
რესპუბლიკელმა სენატორმა ტომ ტილისმა (Thom Tillis) აშშ-ს სენატის საბანკო კომიტეტს კრიპტობაზრის რეგულირების შესახებ კანონპროექტის (CLARITY) განხილვის გადადებისკენ მოუწოდა.
მისი თქმით, საბანკო სექტორისა და კრიპტოინდუსტრიის წარმომადგენლებს სტეიბლკოინების სარგებლის საკითხთან დაკავშირებით აზრთა სხვადასხვაობის შესათანხმებლად დამატებითი დრო სჭირდებათ.
ამის შესახებ ტილისმა გამოცემა Punchbowl News-სთან განაცხადა. სენატორმა ასევე აღნიშნა, რომ აპრილში საბანკო კომიტეტის მიერ კანონპროექტის განხილვას არ ელოდება.
კრიპტოინდუსტრიისა და საბანკო სექტორის წარმომადგენლებს შორის მოლაპარაკებებს სწორედ ტილისი უძღვება.
„მნიშვნელოვანია, რომ პროცესი არ დავაჩქაროთ, მოვუსმინოთ ყველა მხარის პოზიციას და მიღებული გადაწყვეტილებები დავასაბუთოთ. “ – განაცხადა სენატორმა.
ტილისის განცხადებების პარალელურად, კრიპტოინდუსტრიის ინტერესების დამცველმა ჯგუფმა The Digital Chamber სენატის საბანკო კომიტეტს CLARITY-ის განხილვის დაჩქარების მოთხოვნით წერილობით მიმართა. მიმართვაში აღნიშნულია, რომ წარმომადგენელთა პალატის მიერ კანონპროექტის დამტკიცებიდან 270 დღეზე მეტი გავიდა.
ინიციატივის განხილვის ვადები არაერთხელ გადაიწია. აშშ-ის ფინანსთა მინისტრმა სკოტ ბესენტმა (Scott Bessent) მანამდე მხარეები გააფრთხილა , რომ პროცესის ნოემბრის პრაიმერებამდე გაჭიანურების შემთხვევაში, შესაძლოა კანონი ვერ მიიღონ.
„თუ დემოკრატები წარმომადგენელთა პალატაზე კონტროლს მოიპოვებენ, შეთანხმების მიღწევის შანსები მნიშვნელოვნად შემცირდება.“ – აღნიშნა მან.
მთავარ სადავო საკითხად სტეიბლკოინებზე სარგებლის (პროცენტის) დარიცხვის თემა რჩება. ბანკები მიიჩნევენ, რომ პროცენტის გადახდის ნებართვამ შესაძლოა დეპოზიტების გადინება გამოიწვიოს, განსაკუთრებით რეგიონული საკრედიტო ორგანიზაციებიდან.
სენატის საბანკო კომიტეტის მიერ CLARITY-ის განხილვა აპრილის ბოლოს იგეგმებოდა. მანამდე კოლეგები ვაიომინგის შტატის რესპუბლიკელმა სენატორმა სინტია ლამისმა (Cynthia Lummis) გააფრთხილა. მისი თქმით, განხილვის ვადის გადაცილების შემთხვევაში, კანონმდებლებისთვის პრიორიტეტული საარჩევნო კამპანიები გახდება და კანონპროექტს 2026 წლის ნოემბრის შუალედური არჩევნების წინ დიდ ყურადღებას აღარავინ დაუთმობს.
სიახლეების გამოწერა
