სენატორი უორენი ტრამპის კრიპტო გარიგების გამოძიებას მოითხოვს

სენატორი უორენი ტრამპის კრიპტო გარიგების გამოძიებას მოითხოვს

მასაჩუსეტსის შტატის დემოკრატმა სენატორმა ელიზაბეტ უორენმა (Elizabeth Warren) აშშ-ის სამართალდამცავი ორგანოებისგან „პრეზიდენტ დონალდ ტრამპის დადებული 2 მილიარდი დოლარის კრიპტო გარიგების“ გამოძიება მოითხოვა.

უორენმა სოფლის მეურნეობის კომიტეტის წევრ დემოკრატ სენატორ ელისა სლოტკინთან (Elissa Slotkin) ერთად, აშშ-ის სახელმწიფო დეპარტამენტს, ვაჭრობისა და ეთიკის სამინისტროებს წერილები გაუგზავნა. სენატორებმა ხელოვნური ინტელექტისა და კრიპტოვალუტის საკითხებში თეთრი სახლის უფროსი მრჩევლის, დევიდ საკსის (David Sacks) და ახლო აღმოსავლეთში თეთრი სახლის სპეციალური წარმომადგენლის, სტივ ვიტკოფის (David Sacks) დაუყოვნებლივ შემოწმება მოითხოვეს.

სენატორები შიშობენ, რომ ორივე თანამდებობის პირი შესაძლოა პირდაპირ უცხოურ კომპანიებთან მრავალმილიარდიანი კრიპტო გარიგებაში და სერიოზულ ინტერესთა კონფლიქტში იყოს ჩართული. საქმე ეხება 2 მილიარდიან გარიგებას, რომელიც ა.წ გაზაფხულზე შედგა და რომელშიც ორივე თანამდებობის პირი მონაწილეოდა. გარიგების ფარგლებში არაბთა გაერთიანებულ საემიროებში დაფუძნებულმა კომპანიამ MGX სტეიბლკოინ USD1-ს გამოყენებით მსოფლიოში უდიდეს კრიპტო ბირჟა Binance-ში წილი შეიძინა. ზემოთხსენებული სტეიბლკოინი ტრამპების ოჯახის კუთვნილი კრიპტოვალუტის პლატფორმა World Liberty Financial-ს ეკუთვნის.

უორენის მტკიცებით, ეს არ იყო მხოლოდ ინვესტიციები, არამედ აშშ-ის მაღალი რანგის მაღალჩინოსნების მხრიდან განხორციელებული გარიგებები. წერილის ავტორები ამტკიცებენ, რომ საქსმა და ვიტკოფმა გარიგების მოლაპარაკებებში მნიშვნელოვანი როლი ითამაშეს. ისინი მხარს უჭერდნენ აშშ-ის პოლიტიკის ცვლილებებს, რომლებიც არაბთა გაერთიანებულ საემიროებს ამერიკული ხელოვნური ინტელექტის მოწინავე სისტემებზე წვდომის შესაძლებლობას მისცემდა. უორენი შიშობს, რომ უცხოელ მაღალჩინოსნებთან პოლიტიკურად მოტივირებულმა კრიპტო ტრანზაქციებმა შესაძლოასაფრთხე შეუქმნას აშშ-ის ეროვნულ უსაფრთხოებას. მისი თქმით, ტრამპი და მისი რწმუნებულები მთავრობის პასუხისმგებლობებს საკუთარი კერძო ბიზნესის ინტერესებთან ურევენ.

წერილის ავტორები კოლეგა კანონმდებლებს სთხოვენ, ტრამპის კრიპტოვალუტებთან დაკავშირებულ ინიციატივებს მხარი მანამ არ დაუჭირონ, სანამ კონგრესი წერილზე მკაფიო პასუხებს არ მიიღებს.

უორენმა ცოტა ხნის წინ აშშ-ის იუსტიციის დეპარტამენტს კიდევ ერთი წერილი გაუგზავნა, რომელშიც Binance-ს ბრალი ფულის გათეთრების საწინააღმდეგო რეგულაციების (AML) დარღვევის გამო აშშ-ის ხელისუფლებასთან დადებული საპროცესო შეთანხმების შეუსრულებლობაში დასდო.

წყარო: https://www.nytimes.com/2025/09/24/us/politics/trump-witkoff-sacks-saudi-chips-crypto.html