by Maria 
უკრაინის რადა სახელმწიფო კრიპტორეზერვის შესახებ კანონპროექტს განიხილავს
უკრაინის უმაღლესი რადას ფინანსების, გადასახადებისა და საბაჟო პოლიტიკის კომიტეტის თავმჯდომარის პირველი მოადგილის, იაროსლავ ჟელეზნიაკის განცხადებით, პარლამენტმა დაიწყო კანონპროექტის განხილვა, რომელიც ქვეყნის ოქროსა და ვალუტის რეზერვებში კრიპტოაქტივებსაც ჩართავს. კანონპროექტი დეპუტატთა ჯგუფმა: მაქსიმ ბუჟანსკიმ, ალექსეი ჟმერენეცკიმ და მათ შორის თავად ჟელეზნიაკმა წარადგინეს.
ჟელეზნიაკმა განაცხადა, რომ კანონი უკრაინის ეროვნულ ბანკს ვირტუალური სახელმწიფო რეზერვის შექმნის შესაძლებლობას მისცემს. ხოლო ცენტრალურ ბანკს ექნება უფლება დამოუკიდებლად გადაწყვიტოს, როდის და რა მოცულობის კრიპტოვალუტა დაემატოს ამ რეზერვს. ჟელეზნიაკის თქმით, ეს ნაბიჯი უკრაინას გლობალური ფინანსური სისტემის განვითარებაში მონაწილეობის მიღების საშუალებას მისცემს.
ჟელეზნიაკის აზრით, ეკონომიკური არასტაბილურობის პირობებში, მაშინ როცა აშშ დოლარი სუსტდება, BTC-ის რეზერვების ქონა მიზანშეწონილია. მისი თქმით, კრიპტოვალუტის რეზერვების სათანადო მართვა ხელს შეუწყობს მაკროეკონომიკური სტაბილურობის განმტკიცებას და ციფრული ეკონომიკის განვითარების ახალ შესაძლებლობებს შექმნის.
„ეს იდეა არ არის ახალი : შეერთებული შტატები კრიპტოვალუტების სტრატეგიულ რეზერვს უკვე აყალიბებს. კრიპტოვალუტასთან დაკავშირებულ მრავალფეროვან ინიციატივებს სხვა ქვეყნებიც, მათ შორის სალვადორი და ჩინეთიც ახორციელებენ. ბიტკოინის დახმარებით, ისინი მრავალმილიარდიან კაპიტალს იზიდავენ. შვეიცარია, ბრაზილია, პაკისტანი, ყირგიზეთი, ჩეხეთი და ევროკავშირის ზოგიერთი ქვეყანა ასევე მუშაობს კრიპტოაქტივების საკუთარ რეზერვებში ჩართვაზე.“ – თქვა ჟელეზნიაკმა.
უკრაინის ხელისუფლებას კრიპტორეზერვის შექმნაში მხარდაჭერა მსოფლიოს უდიდესმა კრიპტო ბირჟა Binance-მა აღუთქვა.
