by Bachita Land 
ჩინეთი კრიპტოვალუტებს სტეიბლკოინების დახმარებით დაუბრუნდება
HashKey Group-ის აღმასრულებელმა დირექტორმა სიაო ფენგმა (Xiao Feng), რომელსაც მეტსახელად „ჩინური ბლოკჩეინის მამას“ უწოდებენ, გამოთქვა ვარაუდი იმის შესახებ, თუ როგორ შეიძლება შეიცვალოს კრიპტოვალუტის რეგულირება ჩინეთსა და ჰონგ-კონგში.
HashKey-ის ხელმძღვანელის განცხადებით, ამჟამად ჰონგ-კონგში სტეიბლკოინების გარშემო დიდი აჟიოტაჟი შეინიშნება, თუმცა ჩინეთის მარეგულირებელი ორგანოები მათ მიმართ კვლავ უკიდურეს სიფრთხილეს იჩენენ. ტოპ მენეჯერი ამას კრიპტოაქტივების ბაზარზე არსებულ აჟიოტაჟსა და რეალობას შორის სერიოზულ უფსკრულად მიიჩნევს. სიაო ფენგის თქმით, სტაბილურ კრიპტოვალუტებს ძირითადად არასტაბილური კრიპტოაქტივებით ვაჭრობისთვის შუალედურ საშუალებად იყენებენ.
მისი თქმით, სავალუტო კონკურენციის ზეწოლის მიზეზით, ჩინეთის მატერიკული ნაწილი კრიპტოვალუტების სამყაროს თანდათან უბრუნდება და ეს პროცესი სტაბილური კრიპტოვალუტებით იწყება. ჩინეთის სახალხო რესპუბლიკა ტოკენიზებულ რეალურ აქტივებზე (RWA) იქნება ფოკუსირებული და შესაძლოა, საბოლოოდ ხელისუფლებამ ბიტკოინი მიიღოს, ვარაუდობს „ჩინური ბლოკჩეინის მამა“.
ფულის გათეთრების საწინააღმდეგო (AML) წესების დაცვას განსაკუთრებულ ყურადღებას ჰონგ-კონგის ხელისუფლება უთმობს, რადგან ჩინეთის ეს ადმინისტრაციული რეგიონი მნიშვნელოვანი ფინანსური ცენტრის რეპუტაციის მოსაპოვებლად იბრძვის, ამბობს HashKey Group-ის ხელმძღვანელი. მისი თქმით, ფულის გათეთრების წინააღმდეგ ბრძოლაში ტრადიციულ სისტემებზე უკეთესი შედეგის მიღწევა ბლოკჩეინს შეუძლია, რადგან ყველა ტრანზაქციის თვალყურის დევნება ბლოკჩეინში გამჭვირვალედ არის შესაძლებელი.
„ჰონგ-კონგს აქვს პოტენციალი საერთაშორისო ფინანსური ცენტრი გახდეს. აქ კონცეფცია „ერთი ქვეყანა, ორი სისტემის“ ფარგლებში სამართლის ერთიანი სისტემა მოქმედებს. ჰონგ-კონგი ჩინეთსა და დანარჩენ მსოფლიოს შორის დამაკავშირებელი ხიდის როლს ასრულებს. მისი მომავალი აზიურ უოლ-სტრიტად გადაქცევაა. სინგაპური კი პირიქით, ისე მოქმედებს, როგორც აზიური შვეიცარია. მათი ფინანსური სტრატეგიები სრულიად განსხვავებულია“- აღნიშნავს სიაო ფენგი.
1 აგვისტოდან ჰონგ-კონგის ხელისუფლებამ სტაბილური კრიპტოვალუტების სახელმწიფო ლიცენზიის გარეშე პოპულარიზაციისთვის სანქციები გაამკაცრა. დამრღვევებს 50 000 ჰონგ-კონგური დოლარის (6 300 აშშ დოლარი) ოდენობის ჯარიმა და ექვს თვემდე თავისუფლების აღკვეთა ემუქრებათ. მანამდე ჰონგ-კონგის სავალუტო ორგანომ (HKMA) გაფრთხილება გაავრცელა, რომ სტეიბლკოინების ემიტენტი კომპანიებისთვის შეზღუდული რაოდენობის ლიცენზიებს გასცემდა.
