ცუდ კანონზე უკეთესი რეგულაციის არარსებობაა

ცუდ კანონზე უკეთესი რეგულაციის არარსებობაა

Coinbase-ის აღმასრულებელმა დირექტორმა, ბრაიან არმსტრონგმა (Brian Armstrong), აშშ-ის კრიპტო ბაზრის სტრუქტურის შესახებ შემოთავაზებული კანონმდებლობა გააკრიტიკა და განაცხადა, რომ რეგულირების არარსებობა უკეთესია ვიდრე კანონი, რომელიც ინდუსტრიის მონაწილეთა უფლებებს არღვევს.

არმსტრონგმა დაწერა, რომ მან აშშ-ის სენატის საბანკო კომიტეტის მიერ წარდგენილ კანონპროექტში მრავალი ხარვეზი აღმოაჩინა და შესაბამისად, მას მხარს ვერ დაუჭერს. მისი აზრით, ეს ინიციატივა კრიპტოინდუსტრიას დაასუსტებს.

Coinbase-ის აღმასრულებელმა დირექტორმა განმარტა, რომ კანონპროექტი კრძალავს ტოკენიზებულ ფასიან ქაღალდებს, ზღუდავს დეცენტრალიზებულ ფინანსებს (DeFi) და არღვევს მომხმარებლის კონფიდენციალურობას, რადგან მთავრობას ადამიანების ფინანსურ მონაცემებზე წვდომა ეძლევა. კანონპროექტი ასევე კრიპტოვალუტების რეგულირების კუთხით სასაქონლო ფიუჩერსებით ვაჭრობის კომისიის (CFTC) უფლებამოსილებას შეასუსტებს და უფრო მეტ უფლებებს ფასიანი ქაღალდებისა და ბირჟების კომისიას (SEC) მიანიჭებს.

არმსტრონგმა სტეიბლკოინების რეგულირებასთან დაკავშირებული ცვლილებებიც გააკრიტიკა. კანონმდებლების წინადადებებმა, რომლებიც სტაბილური კრიპტოვალუტების გამოყენებისთვის ჯილდოს გადახდის შეზღუდვას ან აკრძალვას ისახავს მიზნად, შესაძლოა, ბანკებსა და სტეიბლკოინების ემიტენტებს შორის სამართლიან კონკურენციას ხელი შეუშალონ. არმსტრონგის მოსაზრებით, ეს რეგულაციები, დიდი ალბათობით, მომხმარებლებს ვერ დაიცავს.

„ჩვენ ვაფასებთ სენატის ორპარტიულ შრომას, თუმცა კანონპროექტის ეს ვერსია არსებულზე ბევრად უარესია. ცუდს გვირჩევნია, კანონპროექტი საერთოდ არ გვქონდეს.“ – დაწერა არმსტრონგმა X-ის სოციალურ ქსელში.

ცოტა ხნის წინ, Coinbase-ის აღმასრულებელმა დირექტორმა ახსნა ბიტკოინსა და ოქროს შორის განსხვავება და მიანიშნა, რომ პირველი კრიპტოვალუტა შესაძლოა ერთ დღეს ოქროსთან ერთად ეროვნული რეზერვის ნაწილი გახდეს.

წყარო: https://x.com/brian_armstrong/status/2011545247105355865