by Maria 
ავსტრალიის ხელისუფლებამ Binance-ს გარე აუდიტის ჩატარება მოსთხოვა
მსოფლიოში უდიდესი კრიპტო ბირჟის, Binance-ის ავსტრალიურმა ფილიალმა ადგილობრივი ხელისუფლებისგან გარე აუდიტორის ჩატარების მოთხოვნა მიიღო. ავსტრალიის ფინანსური დაზვერვის განყოფილების (AUSTRAC) ცნობით, ამის მიზეზი ფულის გათეთრებისა და ტერორიზმის დაფინანსების მონიტორინგის პროცედურებთან დაკავშირებული პრობლემები გახდა.
ფინანსური დაზვერვის სააგენტოს ცნობით, Binance-ის ბიზნეს შეთავაზებების მასშტაბებთან და პოტენციურ რისკებთან მიმართებაში, მისი საქმიანობის შესახებ ინფორმაცია ძალიან შეზღუდულია.
„ეს არის გლობალური კომპანია, რომელიც ტრანსსასაზღვრო მასშტაბში მაღალი რისკის გარემოში ოპერირებს. შესაძლებლობები და რისკები ბიზნესის ზომისა და მისი ბაზარზე ყოფნის შესაბამისად უნდა იმართებოდეს. ჩვენ ველით, რომ Binance მომხმარებელთა იდენტიფიკაციას, სათანადო შემოწმებას და ტრანზაქციების ეფექტურ მონიტორინგს ჩაატარებს.“ – განაცხადა AUSTRAC-მა.
AUSTRAC-ის წარმომადგენლების განცხადებით, ისინი კომპანიაში პერსონალის გადინების მაღალ მაჩვენებელსა და ციფრული აქტივების კრიმინალური გამოყენების რისკების სუსტ კონტროლს ხედავენ. Binance Australia-ს დამოუკიდებელი გარე აუდიტორების მოსაძებნად და AUSTRAC-სთვის წარსადგენად 28 დღიანი ვადა აქვს.
ეს არ არის პირველი შემთხვევა, როდესაც Binance-ის ავსტრალიური ფილიალი ადგილობრივი ხელისუფლების ყურადღების ქვეშ ექცევა. 2023 წელს, ავსტრალიის ფასიანი ქაღალდებისა და ინვესტიციების კომისიამ (ASIC), კრიპტოვალუტის ბირჟაზე საეჭვო ტრანზაქციების გამოძიების ფარგლებში Binance Australia-ს ოფისებში ჩხრეკა ჩაატარა.
