by Giorgi 
ალაბამას შტატში DAO-ებს იურიდიული პირის სტატუსი მიენიჭებათ
ალაბამას გუბერნატორმა კეი აივიმ (Kay Ivey) ხელი მოაწერა კანონპროექტს, რომელიც დეცენტრალიზებულ ავტონომიურ ორგანიზაციებს (DAO) იურიდიულ სტატუსს ანიჭებს.
კანონპროექტი The DUNA Act ადგილობრივმა რესპუბლიკელმა სენატორმა ლენს ბელმა (Lance Bell) წარადგინა. 17 მარტს კანონპროექტს მხარი 7-ის წინააღმდეგ 82-მა სენატორმა დაუჭირა, ხოლო 16-მა თავი შეიკავა. კანონის ძალაში შესვლა 1 ოქტომბრიდან იგეგმება.
კანონპროექტი დეცენტრალიზებულ ავტონომიურ ორგანიზაციებს შეზღუდული პასუხისმგებლობის საზოგადოებების (შპს) მსგავს სტატუსს ანიჭებს. DAO-ები, რომლებიც ბლოკჩეინზე ფუნქციონირებენ და ჭკვიან კონტრაქტებს იყენებენ, ქონების ფლობას, გარიგების დადებას, სასამართლოში სარჩელის შეტანას შეძლებენ. ასეთი ორგანიზაციების წევრები DAO-ს საქმიანობის შედეგად წარმოშობილი დავების დროს შესაძლოა პირადი პასუხისმგებლობისგან გათავისუფლდნენ.
დეცენტრალიზებული არაკორპორატიული არაკომერციული ასოციაცია (DUNA) ურთიერთშეთანხმებით გაწევრიანებულ მინიმუმ 100 წევრს უნდა მოიცავდეს. ამ ორგანიზაციას ქონების ფლობისა და კომერციული საქმიანობის წარმართვის უფლება ექნება, თუმცა ვერ შეძლებს ამ საქმიანიბისგან მიღებული მოგება მის წევრებს შორის გაანაწილოს.
ამგვარად, ალაბამა ვაიომინგის შემდეგ აშშ-ის მეორე შტატი ხდება, რომელმაც DAO-ებს იურიდიული სტატუსი მიანიჭა. ვაიომინგის შტატმა დეცენტრალიზებული ავტონომიური ორგანიზაციების უფლებამოსილებების გაფართოების შესახებ კანონი 2024 წელს მიიღო. მსგავსი კანონპროექტი ცოტა ხნის წინ დასავლეთ ვირჯინიის დელეგატთა პალატაში რესპუბლიკელმა ტრისტან ლივიტმა (Tristan Leavitt) წარადგინა. კანონპროექტს ამოქმედებისთვის ხელი დასავლეთ ვირჯინიის გუბერნატორმა უნდა მოაწეროს.
