by Giorgi 
ამერიკელი ბანკირები CLARITY-ის წინააღმდეგ
ოჰაიოს შტატის რესპუბლიკელმა სენატორმა და აშშ-ის სენატის საბანკო კომიტეტის წევრმა, ბერნი მორენომ (Bernie Moreno) ამერიკის ბანკირების ასოციაცია (ABA) გააკრიტიკა. კრიტიკის მიზეზი ასოციაციის მხრიდან ფინანსური ორგანიზაციების ხელმძღვანელებისადმი კანონპროექტ CLARITY-ის წინააღმდეგ გაერთიანების მოწოდება გახდა.
მორენოს თქმით, ბანკირები CLARITY-ში ხედავენ „საკანონმდებლო ხვრელს“, რომელიც საფრთხეს უქმნის ეკონომიკურ სტაბილურობას. ბანკებს აქვთ შიში: თუ სტეიბლკოინების მფლობელები თავიანთ ტოკენებზე პროცენტული შემოსავლის მიღებას შეძლებენ, ემიტენტები ბანკების სერიოზული კონკურენტები გახდებიან, ხოლო ხალხი დეპოზიტებიდან ფულის მასობრივად გატანას და მათ სტეიბლკოინებში გადატანას დაიწყებს.
სენატორის მტკიცებით, CLARITY-ის წინააღმდეგ გამოსვლით ბანკები დეპოზიტებზე საკუთარ მონოპოლიას იცავენ. ისინი მომხმარებლებისგან, რომელთა ფულსაც იყენებენ, დიდ მოგებას იღებენ, სანაცვლოდ კი პროცენტების სახით მხოლოდ მცირე წილს გასცემენ. მორენომ მიანიშნა, რომ ABA -ს არა ქვეყნის ეკონომიკური სტაბილურობა, არამედ სტეიბლკოინების ემიტენტებთან კონკურენციის წაგება ადარდებს.
რესპუბლიკელმა ასევე კრიპტოტრეიდერებისა და ციფრულ აქტივებთან მომუშავე კომპანიების მომსახურებაზე ხშირი უარის თქმისა და უკანონო საქმიანობის ეჭვის საფუძველზე მათი ანგარიშების დაბლოკვის გამო ფინანსური ორგანიზაციებიც გააკრიტიკა. პარლამენტარი დარწმუნებულია, რომ კანონის მკაფიოდ გაწერილი დებულებები მსგავსი ეჭვებისა და ფინანსური სისტემისთვის არსებული რისკების აღმოფხვრის შესაძლებლობას შექმნის.
სტეიბლკოინების რეგულირების გარდა, CLARITY მიზნად კრიპტოვალუტებზე ზედამხედველობის უფლებამოსილებების ორ ფინანსურ რეგულატორს: ფასიანი ქაღალდებისა და ბირჟების კომისიასა (SEC) და სასაქონლო ფიუჩერსებით ვაჭრობის კომისიას (CFTC) შორის გაყოფას ისახავს.
თებერვალში მორენომ იმედი გამოთქვა, რომ CLARITY უახლოეს თვეებში იქნება მიღებული, რადგან პრეზიდენტ დონალდ ტრამპის ადმინისტრაციამ კრიპტოინდუსტრიის მხარდაჭერის უზრუნველყოფა უნდა მოასწროს.
წყარო: https://cryptobriefing.com/moreno-aba-opposes-clarity-act-stablecoin-bill/
სიახლეების გამოწერა
