ამ საშინელი წლის შემდეგ კრიპტო ინდუსტრია გაძლიერდება

ამ საშინელი წლის შემდეგ კრიპტო ინდუსტრია გაძლიერდება 

Binance-ის აღმასრულებელმა დირექტორმა ჩენპენ ჯაომ კრიპტო ინდუსტრიაში განვითარებულ წლევანდელ მოვლენებს “საშინელი” უწოდა. მაგრამ იმედი გამოთქვა, რომ ინდუსტრია გაძლიერდება.

ათენში გამართულ ღონისძიებაზე, ჩენპენ ჯაომ (Changpeng Zhao) განაცხადა, რომ ინდუსტრიის ნაწილობრივი აღდგენა უკვე მომავალ წელს არის მოსალოდნელი. თუმცა, კონკრეტული პროგნოზები არ გაუკეთებია.

„ აღდგენის მოლოდინი მაქვს. 2022 წელი საშინელი წელი იყო, ბოლო 6 თვის განმავლობაში ძალიან ბევრი ცუდი რამ მოხდა. მაგრამ, ჩვენ გავაგრძელებთ ინდუსტრიის მონიტორინგს და მხარს დავუჭერთ პოზიტიურ ინოვაციებსა და სტარტაპებს.“- თქვა Binance-ის აღმასრულებელმა დირექტორმა.

ჯაომ ხაზგასმით აღნიშნა, რომ Binance სტაბილურ მდგომარეობას ინარჩუნებს – აქვს მნიშვნელოვანი კაპიტალი და რეზერვები და საერთოდ არ გააჩნია ვალი.

ახლა კომპანია  ინდუსტრიის განვითარებაზე და არა საკუთარ მოგებაზეა ფოკუსირებული.

Binance-ის ხელმძღვანელს კრიპტო ბირჟა FTX-ისა  და მისი დამფუძნებლის, სემ ბენკმენ-ფრიდის კრიტიკა არ დაუშურებია და ის  ბერნარდ მედოფის (Bernard Madoff) პირამიდულ სქემას შეადარა:

„FTX უფრო მედოფის იმპერიას ჰგავს. ეს არის ტყუილი და პირამიდული სქემა. მაგრამ მხოლოდ იმის გამო, რაც FTX-ის ხელმძღვანელობამ ჩაიდინა, კრიპტოვალუტასთან დაკავშირებული ყველა ბიზნესი თაღლითურად არ უნდა მიიჩნიოთ.“

შეგახსენებთ, რომ ინდუსტრიის გამჭვირვალობის გაზრდის მიზნით, ბირჟამ Binance  რეზერვის დადასტურების სისტემა აამოქმედა.

გარდა ამისა, პლატფორმამ რთულ მდგომარეობაში მყოფი კომპანიების დასახმარებლად ფონდი შექმნა.