by Giorgi 
აუდიტორებმა Tether-ის წმინდა მოგება გამოავლინეს
აუდიტორული ფირმა BDO-ს მონაცემებით, ბაზრის კაპიტალიზაციის მიხედვით ყველაზე დიდი სტაბილური კრიპტოვალუტის, USDT-ის ემიტენტის – კომპანია Tether ის წმინდა მოგებამ გასულ წელს 10 მილიარდ დოლარზე მეტი შეადგინა.
გასული წლის განმავლობაში Tether-მა დაახლოებით 50 მილიარდი აშშ დოლარის კრიპტოვალუტა გამოუშვა. ეს კომპანიის ისტორიაში USDT-ის სიდიდით მეორე ემისიაა. მოცულობის ძირითადი ზრდა წლის მეორე ნახევარში დაფიქსირდა: დაახლოებით 30 მილიარდი აშშ დოლარის ოდენობის კრიპტოვალუტა განვითარებადი ქვეყნების მხრიდან აშშ დოლარზე მაღალი მოთხოვნის გამო გამოუშვეს.
31 დეკემბრისთვის, მსოფლიოში ყველაზე პოპულარული სტეიბლკოინის მიმოქცევის მოცულობამ 186 მილიარდ ტოკენს გადააჭარბა, რაც ისტორიული რეკორდია. აუდიტორების მონაცემებით, მსოფლიოში USDT-ს მომხმარებელთა რაოდენობამ 530 მილიონს მიაღწია.
Tether-ის მთლიანმა რეზერვებმა 192.9 მილიარდ დოლარს მიაღწია, ამასთან, კომპანიის ვალდებულებებმა 186.6 მილიარდი დოლარი შეადგინა, საიდანაც თითქმის მთლიანი წილი (186.5 მილიარდი დოლარი) გამოშვებული ტოკენების უზრუნველყოფაზე მოდის. აშშ-ის სახაზინო ობლიგაციებში კომპანიის პირდაპირმა ინვესტიციებმა 122 მილიარდ დოლარს გადააჭარბა.
„ამგვარად, Tether აშშ-ის სახელმწიფო ვალის უმსხვილესი მფლობელების რიგებში შედის, რაც ხაზს უსვამს კომპანიის, როგორც დოლარზე გლობალური მოთხოვნის დაკმაყოფილების მნიშვნელოვანი არხის მზარდ როლს.“ – აღნიშნეს BDO-ს ანალიტიკოსებმა.
ენერგეტიკის, ფინტექის, სოფლის მეურნეობისა და სხვა სფეროებში ინვესტიციების ჩათვლით, კომპანიის საინვესტიციო პორტფელის მოცულობა სულ 20 მილიარდ აშშ დოლარს შეადგენს.
ცოტა ხნით ადრე, Tether-ის აღმასრულებელმა დირექტორმა პაოლო არდოინომ (Paolo Ardoino) Bloomberg-თან ინტერვიუში განაცხადა, რომ კომპანია მსოფლიოში ოქროს რეზერვების უდიდესი კერძო მფლობელი გახდა, კომპანიის ოქროს მარაგებმა თითქმის 140 ტონას მიაღწია.
სიახლეების გამოწერა
