აშშ-დან კრიპტო ინოვაციები გაედინება

აშშ-დან კრიპტო ინოვაციები გაედინება

ცნობილი ვენჩურული ინვესტორი, წარსულში ტელეშოუ Shark Tank-ის მონაწილე, შეშფოთებას გამოხატავს იმასთან დაკავშირებით, რომ აშშ-ს ხელისუფლების მიერ კრიპტოვალუტის ინდუსტრიის „გაურკვეველი რეგულირება“ ამ ინდუსტრიის მონაწილე კომპანიებს სხვა იურისდიქციებში გადასვლას აიძულებს.

კევინ ო’ლირის (Kevin O’Leary) თქმით, ის სპეციალურად ჩადიოდა ვაშინგტონში, რათა პირადად დასწრებოდა კონგრესის სხდომებს, რომელთა მიმდინარეობისას აშშ-ს ფასიანი ქაღალდებისა და ბირჟების კომისიის (SEC) თავმჯდომარე გერი გენსლერმა (Gary Gensler) კრიპტოვალუტების მიმართ მიკერძოებული დამოკიდებულების გამო ზოგიერთი კანონმდებლის მხრიდან კრიტიკა დაიმსახურა.

არაერთი ამერიკელი კანონმდებელი გენსლერის ქმედებებით უკმაყოფილოა, რადგან მისი ძალისხმევით შეერთებული შტატებიდან კრიპტოვალუტის ინოვაციების გადინება ხდება:

„დავინახე როგორ შეწვეს გენსლერი წიწილასავით. ეს წარმოუდგენელი იყო. როგორი სულიერი სიმტკიცე უნდა ჰქონდეს ადამიანს, რომ ამდენ შეტევას გაუძლოს.“

ინვესტორმა გაიხსენა, რომ ამჟამად SEC სასამართლო დავას კრიპტოვალუტის უდიდეს ბირჟებთან აწარმოებს. მაშინ, როცა სავაჭრო პლატფორმამ FTX უკვე შეწყვიტა ფუნქციონირება, SEC-ს დრო არ დაუკარგავს და Coinbase-სა და Binance-ს უჩივლა. Shark Tank-ის ვარსკვლავი შიშობს, რომ სანამ აშშ-ს მაღალჩინოსნები ქვეყნიდან ინოვაციებს დევნიან, კომპანიები საზღვარგარეთ გადადიან.

„თქვენი აზრით, სად წავა მთელი ეს ინოვაციები? არაბეთის გაერთიანებულ საემიროებში, აბუ დაბიში. ეს ჯერ არ გახმაურებულა, მაგრამ აბუ დაბიში ახალი ბირჟის ამოქმედება იგეგმება, რომელიც FTX-სა და Binance-ს ჩაანაცვლებს. აშშ-ს ფარგლებს გარეთ არსებული ბირჟები დაამკვიდრებენ ახალ სტანდარტებს. გენსლერმა Coinbase-ს უჩივლა, ამის გამო Fidelity და Blackrock ძალიან უკმაყოფილოები არიან, რადგან თავიანთ ETF-ებთან მუშაობას ვერ შეძლებენ.“ – აღშფოთება გამოხატა ო’ლირიმ.

ცოტა ხნით ადრე ო’ლირიმ განაცხადა, რომ გაკოტრებულმა FTX-მა მარცხი სწორედ მისი კონკურენტის, Binance-ის ქმედებების გამო განიცადა. ინვესტორი დარწმუნებულია, რომ FTX-ის დაშლის შემდეგ ბევრი კრიპტოვალუტის კომპანია ადრე თუ გვიან მარცხს განიცდის.