აშშ-ის მარეგულირებელმა Binance-ის წინააღმდეგ სარჩელი შეიტანა

აშშ-ის მარეგულირებელმა Binance-ის წინააღმდეგ სარჩელი შეიტანა

აშშ-ის ფასიანი ქაღალდებისა და ბირჟების კომისიამ (SEC) მსოფლიოს უმსხვილესი კრიპტოვალუტის ბირჟა და მისი დამფუძნებელი „სიცრუის ქსელის“ შექმნაში, ვაჭრობის მოცულობის მონაცემების ხელოვნურად გაზრდასა და არარეგისტრირებული ფასიანი ქაღალდებით ვაჭრობაში დაადანაშაულა.

5 ივნისს SEC-მა კოლუმბიის საოლქო სასამართლოს მიმართა და საჯაროდ განაცხადა რომ Binance-ის ადმინისტრაციამ და მისმა აღმასრულებელმა დირექტორმა ჩენპენ ჯაომ (Changpeng Zhao), ვერ შეძლეს ამერიკელი კლიენტებისთვის პლატფორმაზე წვდომა შეეზღუდათ და ასევე

„ბაზრის კონტროლის საკუთარი შესაძლებლობების შესახებ კრიტიკულად მნიშვნელოვანი ინფორმაცია დამახინჯებულად წარმოადგინეს, რითაც ინვესტორები შეცდომაში შეიყვანეს.“

„ბრალდების ცამეტი პუნქტის საფუძველზე ჩვენ ვამტკიცებთ, რომ ჩენპენ ჯაო და Binance ინვესტორების მოტყუების ფართომასშტაბიან ქსელში, ინტერესთა კონფლიქტში, ინფორმაციის დაფარვასა და კანონის შესრულებისგან თავის განზრახ არიდებაში იყვნენ ჩართულნი.“ – განაცხადა SEC-ის თავმჯდომარემ გერი გენსლერმა (Gary Gensler).

SEC Binance-ს ფასიანი ქაღალდების შესახებ ფედერალური კანონის მრავალგზის დარღვევასა და არარეგისტრირებული ფასიანი ქაღალდებით ვაჭრობაში 136 გვერდისგან შემდგარ სარჩელში ადანაშაულებს.

არარეგისტრირებულ ფასიან ქაღალდებად SEC-მა შემდეგი ტოკენები მიიჩნია :

Solana (SOL), Cardano (ADA), Polygon (MATIC), Coti (COTI), Algorand (ALGO), Cosmos hub (ATOM), Sandbox (AXS), Axie infinity და Decentraland (MANA).

მიუხედავად ჩენპენ ჯაოს მტკიცებისა, რომ მისი პლატფორმის შვილობილი Binance.US  საქმიანობას სრულიად დამოუკიდებლად აწარმოებს, ფასიანი ქაღალდებისა და ბირჟების კომისია Binance-ის მიერ ამერიკული პლატფორმის ოპერატიულ საქმიანობაში ჩარვის მტკიცებულებების გამოვლენას მოითხოვს.

მანამდე Binance-ის და მისი აღმასრულებელი დირექტორის წინააღმდეგ სარჩელი სასაქონლო ფიუჩერსების სავაჭრო კომისიამ (CFTC) შეიტანა.

ბირჟას და მის ხელმძღვანელს ბრალი ფედერალური კანონებისგან შესაძლო თავის არიდებასა და არარეგისტრირებული ციფრული დერივატივებით ვაჭრობაში ედებოდა.