აშშ-ის ფინანსთა მინისტრი ციფრული დოლარის წინააღმდეგია

აშშ-ის ფინანსთა მინისტრი ციფრული დოლარის წინააღმდეგია

აშშ-ის ფინანსთა მინისტრის, სკოტ ბესენტის (Scott Bessent) განაცხადებით, ის ციფრული დოლარის ამოქმედების წინააღმდეგია. მისი აზრით, ცენტრალური ბანკის ციფრული ვალუტის (CBDC) არსებობა სახელმწიფოს სისუსტის ნიშანია.

კონგრესის სხდომაზე ბესენტმა განაცხადა, რომ ციფრული აქტივები კერძო სექტორს ეკუთვნის, ამიტომ აშშ-ს უცხოური ბანკების რეზერვების სამართავად ციფრული დოლარი არ სჭირდება. მისი თქმით, სახაზინო ობლიგაციები საკმარის მხარდაჭერას უწევს აშშ დოლარს, რომელიც გლობალური ვაჭრობის სფეროში დომინირებს.

„თუ რეზერვების მენეჯერი ან უცხო ქვეყნის ცენტრალური ბანკი აშშ დოლარს ფლობს, არსებობს ამერიკული აქტივების ფართო სპექტრი, რომლებშიც მათ ინვესტირება შეუძლიათ. ცენტრალური ბანკის ციფრული ვალუტა საჭიროა მხოლოდ გამოყენების სიმარტივისთვის, როდესაც არ არსებობს ძირითადი აქტივების არჩევანი“ – განაცხადა ბესენტმა.

ბესენტმა მსგავსი განცხადებები იანვარში აშშ-ის ფინანსთა მინისტრის თანამდებობაზე დანიშვნამდეც გააკეთა. მაშინ მან თქვა, რომ ციფრული დოლარის გამოშვების საჭიროებას ვერ ხედავდა. ინაუგურაციიდან რამდენიმე დღეში ტრამპმა ხელი მოაწერა აღმასრულებელ ბრძანებას, რომელიც სახელმწიფო ციფრული ვალუტების შექმნას, გამოშვებას, მიმოქცევას და გამოყენებას კრძალავდა. თებერვალში აშშ-ის ფედერალური რეზერვის თავმჯდომარემ ჯერომ პაუელმა (Jerome Powell) დაადასტურა, რომ მარეგულირებელი საკუთარ ციფრულ ვალუტას არ გამოუშვებს.

თუმცა, არსებობს ეჭვები, რომ ახალი ადმინისტრაციის პირობებში შესაძლოა ყველაფერი შეიცვალოს. განსაკუთრებით რეცესიის შემთხვევაში. როგორც Cato Institute-ის ანალიტიკოსი ნიკოლას ენტონი (Nicholas Anthony) მიიჩნევს, მაშინ პოლიტიკოსები სხვადასხვა ფინანსურ ინსტრუმენტებს დანერგავენ, მათ შორის ისეთებსაც, რომლებმაც შესაძლოა მომხმარებელთა კონფიდენციალობა დაარღვიოს.

ცოტა ხნით ადრე, აშშ-ის ფედერალური რეზერვის საბჭოს წევრმა ლაელ ბრეინარდმა (Lael Brainard) განაცხადა, რომ შეერთებულ შტატებს ციფრული დოლარი სჭირდება, რათა ფეხი აუწყოს მსოფლიოს სხვა ქვეყნებს, რომლებიც საკუთარ ციფრულ ვალუტებს გამოუშვებენ.