აშშ-ის ფინანსთა სამინისტრომ ორ ბრიტანულ კრიპტო ბირჟას სანქციები დაუწესა

აშშ-ის ფინანსთა სამინისტრომ ორ ბრიტანულ კრიპტო ბირჟას სანქციები დაუწესა

აშშ-ის ფინანსთა სამინისტროს უცხოური აქტივების კონტროლის ოფისმა (OFAC) ირანთან შესაძლო კავშირის მიზეზით დიდ ბრიტანეთში რეგისტრირებულ კრიპტოვალუტის ბირჟებს Zedcex-სა და Zedxion-ს სანქციებიი დაუწესა.

OFAC-ის წარმომადგენლების განცხადებით, კრიპტო ბირჟები ამუშავებდნენ ტრანზაქციებს, რომლებიც აშშ-ს მიერ ტერორისტულ ორგანიზაციად გამოცხადებული ისლამური რევოლუციის გუშაგთა კორპუსის (IRGC) კრიპტო საფულეებთან იყო დაკავშირებული. აშშ-ის ხელისუფლების ცნობით, ბრიტანული პლატფორმები სანქციების გვერდის ავლით თანხების გადაადგილებისთვის გამოიყენებოდა.

„ეს პირველი შემთხვევაა, როდესაც უცხოური აქტივების კონტროლის ოფისმა ციფრული აქტივების ბირჟა ირანის ფინანსურ სექტორში ჩართულ და სანქციებისგან თავის არიდების ხელშემწყობ სუბიექტად დაასახელა.“ – განაცხადა აშშ-ის ფინანსთა სამინისტრომ.

სანქციები დაეკისრა ირანელ ბიზნესმენს ბაბაკ ზანჯანისაც (Babak Zanjani). აშშ-ის დეპარტამენტი მიიჩნევს, რომ ის ორივე ბრიტანულ კრიპტო ბირჟასთან არის დაკავშირებული და მონაწილეობდა სქემებში, რომლებიც ირანის ხელისუფლებას ნავთობზე დაწესებული სანქციებისგან თავის არიდებაში ეხმარებოდა.

OFAC-ის სანქციები აშშ-ს ტერიტორიაზე ბიზნესმენისა და ორი კრიპტო ბირჟის აქტივების გაყინვას, ასევე ამერიკელი ფიზიკური და იურიდიული პირებისთვის ჩამოთვლილ პირებთან ნებისმიერი ტრანზაქციის განხორციელების აკრძალვას მოიცავს.

ცოტა ხნით ადრე, TRM Labs-ის ანალიტიკოსებმა განაცხადეს, რომ ბოლო ერთი წლის განმავლობაში კრიპტო ბაზარზე საერთაშორისო სანქციებისგან თავის არიდების აქტივობა დოლარში 400%-ზე მეტით გაიზარდა.

წყარო: https://home.treasury.gov/news/press-releases/sb0375