აშშ-ს მთავრობა კრიპტოვალუტების რეგულირების წესებს შეიმუშავებს

აშშ-ს მთავრობა კრიპტოვალუტების რეგულირების წესებს შეიმუშავებს

აშშ-ს ფასიანი ქაღალდებისა და ბირჟების კომისიამ (SEC) სამუშაო ჯგუფის შექმნის შესახებ გამოაცხადა, რომელიც ამერიკული კრიპტო ბაზრის მარეგულირებელ საკანონმდებლო ბაზას შეიმუშავებს.

სამუშაო ჯგუფს SEC-ის კომისარი, რესპუბლიკელი ჰესტერ პირსი (Hester Peirce) უხელმძღვანელებს. პირსი დიდი ხანია კრიპტოვალუტების მხარდამჭერია, რის გამოც მას მეტსახელად „კრიპტო დედა” შეარქვეს.

უწყების განცხადებით, სამუშაო ჯგუფი კრიპტო ბაზრის მონაწილეებთან ითანამშრომლებს, რათა ციფრულ აქტივებთან მომუშავე კომპანიებისთვის „უფრო გამჭვირვალე და გასაგები გზამკვლევი შექმნას“. SEC საკუთარი უფლებამოსილების საზღვრების დადგენას, ბაზრის მონაწილეთა რეგისტრაციისთვის კონკრეტული მოთხოვნების უზრუნველყოფას და ინფორმაციის გამჟღავნების შესახებ სახელმძღვანელოს შემუშავებას აპირებს.

სააგენტო სხვა ფედერალურ სააგენტოებთან, მათ შორის აშშ-ს საქონლის ფიუჩერსების სავაჭრო კომისიასთან (CFTC) თანამშრომლობას გეგმავს.

ბოლო ოთხი წლის განმავლობაში, გერი გენსლერის (Gary Gensler) ხელმძღვანელობით, SEC-მა კრიპტო კომპანიების წინააღმდეგ 100-ზე მეტი სარჩელი შეიტანა. საქმეები არა მხოლოდ ციფრული აქტივებით თაღლითობის ბრალდებებს მოიცავდა – მარეგულირებელმა მრავალი კომპანია არარეგისტრირებული ფასიანი ქაღალდებით ვაჭრობაში დაადანაშაულა.

SEC-ის ამჟამინდელი თავმჯდომარე დონალდ ტრამპის მიერ დანიშნული რესპუბლიკელი მარკ უედაა (Mark Uyeda). უედა თანამდებობას მანამ დაიკავებს, სანამ სენატი სააგენტოს მუდმივ თავმჯდომარეს არ დაამტკიცებს. ამ პოსტზე მთავარი კანდიდატი პოლ ატკინსია (Paul Atkins).