აშშ-სა და ევროკავშირს კრიპტოინდუსტრიის ლიდერობა შეუძლიათ

აშშ-სა და ევროკავშირს კრიპტოინდუსტრიის ლიდერობა შეუძლიათ

ფინანსური სერვისების ევროკომისარმა მეირიდ მაკგინესმა, კრიპტოვალუტების სწრაფი განვითარების ფონზე, ევროკავშირსა და აშშ-ს ინდუსტრიის რეგულირებისთვის გაერთიანებისკენ მოუწოდა.

მეირიდ მაკგინესის (Mairead McGuinness) აზრით,  ამ გზით მარეგულირებლები ინვესტორებს და გარემოს კრიპტოვალუტებით გამოწვეული ზიანისგან დაიცავენ .

თავის განცხადებაში ის ყურადღებას  იმ ფაქტზე ამახვილებს, რომ კრიპტოვალუტა მეინსტრიმად გადაიქცა.

„უბრალოდ გაიხსენეთ Super Bowl-ის რეკლამა. სულ უფრო მეტი ინვესტორი, მათ შორის ახალგაზრდები, საკუთარ ძალებს კრიპტოვალუტის ბაზარზე ცდიან. მათ  სოციალური ქსელები, მაღალი მოგების დაპირებები და ახალი, ღია და ინოვაციური ფინანსური სისტემის აშენების პერსპექტივა იზიდავთ.

მაგრამ არასტაბილურ ციფრულ ვალუტაში ინვესტირება შეიძლება სარისკო იყოს.“- ამბობს მაკგინესი.

ის აღნიშნავს, რომ აშშ-ს პრეზიდენტის ჯო ბაიდენის განკარგულება აშშ-ში კრიპტოვალუტების რეგულირებას უხსნის გზას.

ევროკავშირი კრიპტო აქტივების კომპლექსური წესების დანერგვის საბოლოო ეტაპზეა.

„ კრიპტოვალუტა გლობალურია და ჩვენი მიდგომაც გლობალური უნდა იყოს. მე მჯერა, რომ ევროკავშირსა და აშშ-ს ერთად შეუძლიათ კრიპტოვალუტების რეგულირების საერთო, საერთაშორისო მიდგომას გაუხსნან გზა.  მომხმარებელთა დაცვისა და ფინანსური სტაბილურობის ხელშეწყობით  ჩვენ ერთად შეგვიძლია ფინანსური ინოვაციების უზრუნველყოფა.“

გამოსვლის დასასრულს, კომისარმა საერთაშორისო საზოგადოებას მოუწოდა დააჩქაროს G20 ფინანსური სტაბილურობის საბჭოსა და ინდუსტრიის სტანდარტიზატორების მიერ შესრულებული სამუშაო და კრიპტო აქტივებისადმი გლობალური მიდგომის შეთანხმებაზე გადავიდეს.

მისი თქმით, G20-ის ფინანსთა მინისტრებისა და ცენტრალური ბანკირების შეხვედრა,

რომელიც 2022 წლის 17 და 18 თებერვალს გაიმართა, კრიპტოვალუტების გლობალური რეგულირების მიმართულებით გადადგმული პირველი ნაბიჯია.