აშშ-ს მთავრობა კრიპტო კომპანიებისთვის საგადასახადო ცვლილებებს გეგმავს

აშშ-ს მთავრობა კრიპტო კომპანიებისთვის საგადასახადო ცვლილებებს გეგმავს

Trump Organization-ის აღმასრულებელმა ვიცე-პრეზიდენტმა და პრეზიდენტ დონალდ ტრამპის ვაჟმა თეთრი სახლის ახალი ადმინისტრაციის გეგმების შესახებ ისაუბრა. მისი განცხადებით, თეთი სახლი აშშ-ში რეგისტრირებული ბაზრის მონაწილეებისთვის, როგორიცაა Ripple, Hedera Hashgraph, Algorand და Cardano, კაპიტალის მოგების გადასახადის გაუქმებას გეგმავს.

ერიკ ტრამპმა (Eric Trump) მთავრობის მხრიდან შეერთებულ შტატებში რეგისტრირებული კრიპტო პროექტებისთვის კაპიტალის მოგების ნულოვანი გადასახადების დაწესების განხილვის შესახებ ჟურნალისტებს განუცხადა. ამავდროულად, ბიზნესმენის თქმით, უცხოური კრიპტო კომპანიებისთვის საგადასახადო განაკვეთი შესაძლოა 37%-მდე გაიზარდოს.

„ნულოვანი საგადასახადო განაკვეთი არა მხოლოდ ახალ კრიპტო სტარტაპებზე, არამედ ბაზარზე უკვე დამკვიდრებულ კომპანიებზეც გავრცელდება, რომლებიც ბლოკჩეინის ტექნოლოგიაზე, კრიპტოვალუტის მაინინგზე, დეცენტრალიზებულ ფინანსებზე (DeFi) და სხვა ერთმანეთთან დაკავშირებულ სერვისებზეა ფოკუსირებული.“- თქვა უმცროსმა ტრამპმა.

ჟურნალი Forbes-ის ცნობით, კრიტიკოსები ფიქრობენ, რომ მსგავსმა გადაწყვეტილებამ, შესაძლოა აშშ-ს კრიპტო ბაზარზე დისბალანსი და ქვეყნის ბიუჯეტისთვის მნიშვნელოვანი ფინანსური დანაკარგები გამოიწვიოს. თუმცა, ჟურნალის ექსპერტების აზრით, მოვლენების ასეთი სცენარით განვითარება ნაკლებად სავარაუდოა, რადგან ერიკ ტრამპი არჩეული თანამდებობის პირი არ არის და მისი განცხადებები მხოლოდ მის პირად აზრს გამოხატავს.

მეტიც, პრეზიდენტს არ აქვს უფლება, ქვეყნის საგადასახადო კანონმდებლობა საკუთარი სურვილისამებრ შეცვალოს. მას ცვლილებების შეტანა აშშ-ს კონგრესის მეშვეობით მოუწევს. ორივე პალატაში რესპუბლიკური პარტიის მცირე უპირატესობის გათვალისწინებით, არ არსებობს გარანტია იმისა, რომ კრიპტოვალუტის ინდუსტრიაზე ნულოვანი კაპიტალის მოგების გადასახადი საკანონმდებლო მხარდაჭერას მოიპოვებს.

მანამდე, ერიკ ტრამპმა უსაფუძვლო უწოდა ეჭვებს, რომ კრიპტო კრედიტორი World Liberty, რომელსაც ის მართავს, შესაძლოა ირიბად ახლო აღმოსავლეთის ბოევიკების დაფინანსებაში იყოს ჩართული.