აშშ-ს საიდუმლო სამსახური კრიპტოვალუტის ცენტრს ქმნის

აშშ-ს საიდუმლო სამსახური კრიპტოვალუტის ცენტრს ქმნის 

აშშ-ს ფინანსური სისტემის უსაფრთხოების სააგენტომ ციფრული აქტივების უკანონო გამოყენების წინააღმდეგ საბრძოლველად საგანმანათლებლო ინსტრუმენტი შექმნა.

შეერთებული შტატების საიდუმლო სამსახურის (USSS) განცხადებით, ის  კრიპტოვალუტის შესახებ საინფორმაციო ცენტრს აამოქმედებს. ონლაინ რესურსი  საზოგადოებას კრიპტო კრიმინალთან ბრძოლაზე უახლეს ცნობებს მიაწოდებს და მოქალაქეების ციფრული ვალუტების უსაფრთხოების შესახებ ინფორმირებას მოახდენს.

USSS 1865 წლიდან არსებობს და მისი სპეციალიზაცია ქვეყნის ეკონომიკისა და ფინანსური სისტემის დაცვაა. როგორც სამსახურის წარმომადგენლები აცხადებენ, 150 წელზე მეტია, რაც ეკონომიკურ დანაშაულებათა ეფექტურად გამოვლენასა და პრევენციას სწავლობენ.

სამსახურის დირექტორის თანაშემწის, ჯერემი შერიდანის განცხადებით, ცენტრი ფინანსურ დანაშაულს გამოიძიებს.

განცხადებაში ხაზგასმულია, რომ USSS არ აპირებს  ებრძოლოს კრიპტოვალუტებს, რადგან მათ როგორც გადახდის პოპულარულ და სასარგებლო ფორმას განიხილავს.

„ციფრული აქტივების გამოყენებით ინვესტიციები და ტრანზაქციები დანაშაულს არსებითად არ წარმოადგენს.“

შერიდანის თქმით, საზოგადოების დროულად ინფორმირების მიზნით, სამსახური კრიპტოვალუტის ემიტენტებთან და ტექნოლოგიურ კომპანიებთან ძალების გაერთიანებას შეეცდება.

შეგახსენებთ, რომ Pew Research-ის ბოლო კვლევის მიხედვით, ამერიკელების მხოლოდ 24% იცნობს ციფრულ ვალუტებს.

წყარო: https://bits.media/